E kritikuar gjatë ndërtimit të saj si “e padobishme dhe monstruoze, që turpëron bukurinë e Parisit”, Kulla Eiffel po shkakton sërish polemika, por këtë herë për arsye krejtësisht të ndryshme.
Simboli i Parisit dhe një nga pamjet më të mëdha të botës, që tërheq mesatarisht 20 mijë vizitorë në ditë, po dëmtohet dhe sipas mediave franceze, situata është alarmante.
Eiffel urdhëroi që monumenti të rinovohej e lyhej çdo shtatë vjet. Por raundi i fundit përfundoi 14 vjet më parë. Punimet nisën në vitin 2019, por u shtynë për shkak të pandemisë dhe deri më tani vetëm 30 për qind e kullës është rilyer. Sindikata e punëtorëve pretendon se ndryshku i kullës është hequr aq shumë sa ka vënë në pikëpyetje mbijetesën e saj dhe për të gjithë fajin e kanë keqmenaxhimin e monumentit. Ata dënojnë edhe gjendjen e infrastrukturës, për shkak të së cilës turistët me bileta presin në radhë deri në tre orë.
Denis Vavassori, anëtar i sindikatës dhe një nga punëtorët, tha se boja po bie rrezikshëm nga kulla dhe se ndryshku po përhapet gjithnjë e më shumë.
“Kam 21 vjet që punoj këtu dhe nuk e kam parë kurrë në këtë gjendje”, tha ai. “Sa më shumë të kalojë koha, aq më të mëdha do të duhet të jenë riparimet.”
Për shkak të gjithë situatës në shkurt, punëtorët ishin në grevë për gjashtë ditë gjatë së cilës kulla u mbyll, për herë të dytë që nga 27 nëntori, datë që shënoi njëqindvjetorin e vdekjes së Gustave Eiffel.
Dhe për t’i dhënë fund grevës në shkurt, Société d’Exploitation de la Tour Eiffel (SETE), e cila operon kullën dhe është 99 për qind në pronësi të qytetit të Parisit, u zotua të investojë 380 milionë euro në mirëmbajtje dhe rinovim deri në vitin 2031 dhe të balancojë buxhetin deri në vitin 2025. Por sindikatat janë skeptike dhe kanë kërcënuar të vazhdojnë grevën gjatë Lojërave Olimpike këtë verë, kur kryeqyteti pritet të presë më shumë se 15 milionë turistë.
Problemet nisën me pandeminë – kompania SETE humbi 100 milionë euro gjatë viteve 2020 dhe 2021, kur qeveria urdhëroi mbylljen njëvjeçare të objekteve kulturore për shkak të COVID. Prandaj tani po shqyrton rritjen e çmimeve të biletave gjatë Lojërave Olimpike deri në 20 për qind për të rikuperuar disa nga këto humbje.
Sindikatat, megjithatë, pretendojnë se SETE “po shkon drejt katastrofës” sepse modeli i tij i biznesit bazohet në mbivlerësimin e të ardhurave të ardhshme nga shitja e biletave dhe nënvlerësimin e rritjes së kostove të mirëmbajtjes dhe riparimit. Ata besojnë se kompania përpiqet për “përfitim afatshkurtër”.
Ministrja e kulturës e Francës, Rachida Dati, propozoi që kulla, e cila u ndërtua për Ekspozitën Botërore të 1889 në Paris, të klasifikohej si një “monument historik” në mënyrë që shteti të mund të ndihmonte në financimin e punës.
“I gjithë sistemi është jashtë ekuilibrit,” tha një përfaqësues i sindikatës, duke shtuar se “në nëntë vjet, kompania ka bërë një fitim vetëm dy herë, në 2014 dhe 2018. Në përgjigje të kritikave të tyre, nënkryetari i bashkisë së Parisit, Emmanuel Grégoire, postoi në X, ish-Tëitter, se “Kulla Eifel është një perlë, e cila është në gjendje shumë të mirë dhe këshilli do të vazhdojë të investojë në restaurimin e saj”. /tesheshi.com/
