Në 4-mujorin e parë të këtij viti, 29 persona kanë humbur jetën si pasojë e aksidenteve në komunikacion. Gjatë kësaj periudhe kohore, janë regjistruar rreth 5 mijë aksidente, statistika këto të publikuara nga autoritetet e rendit.
“Numri i përgjithshëm i aksidenteve me fatalitet mbetet ende shqetësues për arsye të një ngritjeje prej mbi 4 për qind”, thotë zëdhënësi i policisë Daut Hoxha për Radio “Evropa e Lirë”.
Ai tregon se policia për periudhën janar-prill të këtij viti ka shqiptuar 118. 743 tiketa për shkelësit e ligjit, përkatësisht rregullave të komunikacionit.
Hoxha tutje shton se njësitë relevante policore janë aktive në menaxhimin dhe kontrollin e trafikut rrugor në të gjitha rrugët e vendit, për çka kanë filluar edhe patrullimet me skuterë.
“Ky patrullim, i cili besohet se do të jetë më efikas, pos aspektit parandalues, do të jetë më praktik edhe në arritjen në kohë më të shkurtër aty ku kërkohet intervenimi policor”, thotë Hoxha.
Kujtojmë se gjatë vitit 2017, për periudhën janar-prill 27 persona kanë humbur jetën në aksidente trafiku. /tesheshi.com/
