Një javë pas shpalljes nga Edi Rama të ndryshimeve në qeveri, nisin e shtohen më shumë zërat mbi lëvizjet e mundshme që kryeministri do të bëjë në shtator.
Gjithçka do të varet nga vendimi i muajit qershor për hapjen e negociatave, vendim që ka në orë fatin e disa anëtarëve të qeverisë.
Por siç mësohet, Edi Rama u ka thënë të gjithë ministrave të tij që janë në garë të barabartë dhe në fund të verës do të analizohen dy matësa që përdorin këshilltarët e huaj të kryeministrit: sondazhet dhe një metodë e matjes së performancës, nëpërmjet arritjeve që ministrat kanë kryer prej një viti.
Plani për ndryshimin e qeverisë këtë vit ka qenë i vjetër dhe u bë i ditur nga Edi Rama që pas fitores më 25 qershor, por ngjarja e Kukësit ka bërë që ky plan të ketë një ndryshim thuajse rrënjësor.
Ndryshimi i axhendës është bërë nga një konflikt që ka shpërthyer ndërmjet kryeministrit dhe dy superministrave të tij, Damian Gjiknuri dhe Arben Ahmetaj. Këta të fundit janë përplasur fort me kreun e qeverisë për çështjen e pagesës së Rrugës së Kombit.
Siç ditë tashmë, vendosja e kabinave të pagesës në Kalimash që shkaktoi edhe protestën më të fortë ndaj Edi Ramës, vetëm një vit pas zgjedhjeve, ka ndryshuar një pjesë të madhe të planeve.
Edhe pse kontrata e konçensionarit për vendosjen e pagesës ka kaluar në Parlament dhe dihej afërsisht tarifa e mundshme, vendosja e kabinave në kohën që ndodhi mësohet se është bërë pa studim e konsultim dhe duke ndjekur politikën e “faktit të kryer”.
Vendimi mësohet se është marrë nga ministri Financave dhe Ekonomisë, Arben Ahmetaj dhe ai i Energjisë dhe Infrastrukturës, Damian Gjiknuri. Dhe nga burime të brendshme thuhet se kur pa lajmet mbi vendosjen e tolleve dhe nisjen e pagesës, Rama ka thirrur menjëherë ministrat duke u kërkuar llogari.
Ndërkaq, pas protestës, kur Rama ka kërkuar publikisht “ndjesë” para qytetarëve të Kukësit, ministrave të tij u ka thënë se kjo ndjesë e dij do të shumëfishohet nga ata që i ka cilësuar si “përgjegjës” për trazirat e Kalimashit, të cilat gati sa nuk provokuan një protestë me pasoja të një reaksioni zinxhir.
Përveç dy superministrave të tij, kabineti pritet të prekë thuajse të gjitha prurjet që vijnë nga qeveria e koalicionit me LSI-në. /tesheshi.com/
