Drejtoria e Arkivave kujton lindjen e atij që e quan “denoncuesin e parë shqiptar të ideologjisë komuniste”. Fjala është për Ali Korçën.
“Si sot, më 5 prill 1873, në Korçë u lind Hafëz Ali Korça, hoxhë, hafiz, hatip, publicist dhe përkthyes i kryeveprave të letërsisë fetare e artistike orientale.
Ali Korça, i biri i Iljaz efendi Kadiut, vinte nga një familje që brez pas brezi kishin qenë dijetarë të fesë. Mësimet fillore dhe të mesme i mori në vendlindje, në shkollën iptidaije dhe atë idadije. Studimet e larta i kreu në medresen ‘Çifte Minareli’ në Stamboll.
Prej njohurive që kishte në gjuhët tradicionale të Lindjes, përktheu kryeveprat fetare e letrare si ‘Mevludi’ më 1900, ‘303 fjalë të Imam Aliut’ botuar në Korçë më 1910. ‘Gjylistani dhe bostani’ të Saadiut më 1918 dhe ‘Rubaijat’ e Khajamit më 1930 nga persishtja.
Në 1925-tën shkroi ‘Bolshevizma a çkatrrim i njerëzimit’ duke u shënjuar si denoncuesi i parë shqiptar i ideologjisë komuniste.
Më 15 shkurt 2017 Presidenti i Republikës Bujar Nishani e vlerësoi pas vdekjes me dekoratën ‘Nderi i Kombit’.
Në Arkiv gjendet fondi personal i Hafëz Ali Korçës dhe sot publikojmë kopure gazetash që flasin për jetën dhe veprimtarinë e tij”, shkruan Arkiva Shqiptare, duke ofruar një biografi telegrafike të kësaj figure të madhe islame. /tesheshi.com/
