Në Ditën Ndërkombëtare të Personave të Zhdukur, familjarë dhe politikanë kanë vendosur lule te përmendorja dedikuar këtyre qytetarëve, në Prishtinë.
Me këtë rast kandidati për kryeministër nga radhët e PAN-it, Ramush Haradinaj ka thënë se çështja e të humburve duhet të zgjidhet sa më parë.
“Duhet te jemi bashkë dhe te përballemi me të vërtetën. Kjo temë nuk duhet të diskutohet”, tha ai.
Nga ana tjetër, Prenk Gjetaj, kryetar i Shoqatës së të Pagjeturve tha se lëshimi i balonave simbolizon faktin që ende plaga e të pagjeturve po rëndon mbi qytetarët.
“Prandaj do të hedhim 18 balona në ajër, për po kaq vite pas lufte që nuk i kemi gjetur”, u shpreh ai.
Kurse , Bajram Çerkini, familjar i të zhdukurve, theksoi se adresa e tyre është Serbia.
“Kemi skica, dëshmi, rrëfime të familjarëve. Betohem se sikur të ishin më kembgulës krerët e institucioneve do të kishim tjetër situatë”, tha ai. /tesheshi.com/
