30 qershori, pos një datë votimesh, për herë të parë pa rivalitet për shkak të bojkotit opozitar, shënon dhe kulmin e një beteje kundër Reformës në Drejtësi, në raportet e ngushta PS-LSI.
Aleanca e shpallur si strategjike në prill 2013, e cila pas dy muajsh do risillte të majtën me Edi Ramën në pushtet, pësoi çarjen e madhe pikërisht nga ajo çfarë ndodhi në korrik të vitit 2016, ku në seancën e fundit të parlamentit, jo vetëm PD por dhe LSI, dhanë votën me pahir në atë që më pas do shndërrohej në makth: Reformën në Drejtësi.
Ndodhi kjo një vit pasi të dy aleatët kishin marrë dhe një pjesë të mirë të pushtetit lokal, ku patën dhe një numër kandidadësh të përbashkët.
Por pas atij votimi proverbial, ku nën diktatin e ndërkombëtarëve, PD e LSI votuan të mallkuarën reformë, shoqëruar nga bindja e shpotitjet e Ramës se “do e votojnë (dhe e votuan) si Çeçua”, LSI do niste projektin e saj për ta zhbërë atë reformë, duke zhbërë bashkë me të, pikërisht Ramën, qeverisjen e tij.
Ç’prej atëherë, çfarë ka ndodhur e ndodh në politikën shqiptare, përplasjet dhe krizat e saj, rrënjët i kanë pikërisht aty, te Reforma në Drejtësi.
Goditjen e parë, LSI tentoi t’ja jepte në imazh. Prej salloneve të saj doli teza se reforma ishte punë e Sorosit.
Por si start, si të shtënë të parë, pati një videopërgjim.
Pak muaj pas votimit të reformës, në ekranin e Ora News, një televizion i afërt me Metën, në emisionin e Ylli Rakipit, një prej shërbyesve të tij mediatikë, do publikohej videoja e lapërdharive të ish-kryebashkiakut të Dibrës, Shukri Xhelili.
Dhe, shkuarja në votimet e pjesshme, do shënonte dhe çarjen e parë në aleancë. Për kreun e ri të Dibrës, LSI zgjodhi ta lërë pa mbështetje aleatin, me projektin e shkaktimit të një humbjeje që do ishte dërrmuese edhe për imazhin e qeverisjes.
Por ishte LSI nr.2 ajo që do përfitonte në këtë situatë. PDIU-ja e Shpëtim Idrizit, pa asnjë çam në Dibër, vendos të përfitojë një llomkë pushtet nga grindja mes dy të mëdhenjve, duke u ofruar si aleate e PS-së. Investimi quhej Imer Lala.
Dhe PS, e friguar se mund ta humbte vërtet Dibrën nga ajo marrëzi e Shukes brekëgrisur, ndonëse kish zgjedhur një figurë me integritet të lartë moral e qytetar për ta pasuar, doktor Muharrem Ramën, shkon dhe i falet gjiithsesi të fortit të atyre anëve, Imer Lalës, çamërizuar nga Shpëtim Idrizi e Aqif Rakipi.
Ky ishte pra momenti kur dhe nis projekti anti-Rama me shënjestër Reformën në Drejtësi. Nisi pra me një videopërgjim. /tesheshi.com/
