Biçikleta si detaj sportiv, është shfaqur heraherës në performancat elektorale të forcave apo individëve të ndryshëm në Shqipëri. E fundit herë ishte ajo e paradisaditëve në Tiranëve, ku të rinj të PS-së u panë majë tyre, rrugëve të kryeqytetit, duke pedaluar në një shfaqje agjitative publike, veshur mavi, me ngjyrën e partisë.
Por duke u kthyer në të kaluarën, kujtojmë se biçikleta daton si detaj elektoral agjitativ në zgjedhjet lokale të vitit 2003. Në atë kohë, përballja e Tiranës ishte mes Edi Ramës dhe Spartak Ngjelës. Ishte pikërisht ky i fundit që vendosi të endej lagje më lagje e rrugë më rrugë, shoqëruar nga një shpurë të rinjsh, për t’i kumtuar gjindjes vizionin qeverisës në planin e menaxhimit të kryeqytetit.
Kuptohej lehtë që përballë një risimtari si Edi Rama, Ngjelës i duhej me doemos që të ofrohej sa më rinior, sa më energjik, sa më trendy, dhe biçikleta i ngërthen të tria këto. Por do ishte po kjo biçikletë që do i bëhej bumerang, kjo falë një batute brilante të Skënder Gjinushit, gjatë një interviste televizive në ditët e fushatës.
Kandidimi i Ngjelës nga PD-ja përflitej si një zgjedhje e Berishës për ta defaktorizuar atë brenda radhëve të partisë, duke qenë i bindur në humbjen e pashmangshme ndaj Ramës. Dhe Gjinushi, duke e shfrytëzuar këtë mit konspirativ politik të momentit, shprehet: “Atë ditë, Avokati do e kuptojë se e Berisha ia ka dhënë biçikletën pa shalë!”.
Ngjela vërtet i humbi zgjedhjet, por në PD erdhi duke u fuqizuar akoma dhe më tepër, përkundër pretendimit të Gjinushit. Avokati u bë koka e komunikimit me publikun në PD deri në ardhjen në pushtet, shtoi kësaj dhe një mandat deputeti.
Pra, ajo që mbeti nga prognoza me shalën e hequr të biçikletës, ishte thjesht aftësia e prodhimit të një metafore të shkëlqyer, me personazhe si Berisha e Ngjela. /tesheshi.com/
