Protestues në Afrikën e Jugut shkatërruan disa dyqane H&M të shtunën, në përgjigje të një reklame nga gjigandi i veshjeve suedeze, e cila u quajt “raciste”.
H&M u përfshi në polemika pasi publikoi një reklamë duke përdorur një djalë-model të zi të veshur me një bluzë me kapuç në të cilën shkruante “majmuni më i lezetshëm i xhunglës”.
Reklama nxiti kritika të përhapura, në mesin e të cilëve edhe këngëtari kanadez The Weekend, i cili kishte shprehur publikisht zemërimin e tij.
Ndërsa marka e veshjeve ka kërkuar falje dhe ka hequr imazhin, dhjetra aktivistë nga lëvizja socialiste Luftëtarët e Lirisë Ekonomike (EFF) protestuan në dyqanet H&M të shtunën në të gjithë Afrikën e Jugut.
Në pamjet e shpërndara në mediat sociale, aktivistët u panë duke kënduar, vallëzuar dhe duke demoluar disa dyqane.
Disa mbanin postera me slogane të tilla si: “Larg me tendencat raciste të H&M”.
Policia u thirr në disa dyqane ku u përdorën plumba gome kundër demonstruesve, sipas raporteve të medias lokale.
Në një cicërimë, zëvendëspresidenti i EFF, Floyd Shivambu tha se H&M po “përballej me pasojat për racizmin e saj”.
“Të gjithë njerëzit e arsyeshëm duhet të pajtohen që dyqani të mos lejohet të vazhdojë të operojë në Afrikën e Jugut,” shtoi ai.
Një zëdhënës i H&M tha se marka e veshjeve ishte “e vetëdijshme për ngjarjet e fundit” dhe kishte mbyllur përkohësisht dyqanet e saj në Afrikën e Jugut.
“Ajo që ka rëndësi më së shumti për ne është siguria e punonjësve tanë dhe konsumatorëve … Ne vazhdojmë të monitorojmë situatën nga afër dhe do të hapim dyqanet sapo situata të jetë e sigurt përsëri”, tha zëdhënësi duke shtuar se asnjë staf apo konsumatorë nuk ishin plagosur në protesta.
“Ne besojmë fuqimisht se racizmi dhe paragjykimet e çfarëdo forme, të qëllimshme apo aksidentale, janë thjesht të papranueshme. Theksojmë se stafi i dyqanit tonë nuk kishte të bënte fare me produktin dhe imazhin tonë dobët të gjykuar”. /tesheshi.com/
