Nga redaksia
Përflitet se korrupsioni dhe nepotizmi ka zaptuar edhe Ministrinë për Kthim dhe Komunitete, dikaster i drejtuar nga serbët, që në vend të ndërtojnë shtëpi për persona të kthyer apo për ata që dëshirojnë të kthehen, po ndërtojnë shtëpi dhe subvencionojnë mikeshat dhe të afërmit e tyre.
Një burim konfidencial i tha portalit tesheshi.com se është pikërisht ministri Dalibor Jevtiç, që personalisht është angazhuar me bërjen e listave se kujt do t`i ndërtojë shtëpinë, por që në to gjenden familjarë dhe miq të tij, sidomos nga Shtërpca, prej dhe nga është vetë.
Po ashtu, për portalin tesheshi.com ka folur dhe një zyrtar serb që punon në ministrinë e drejtuar nga Dalibor Jevtiç, por me kusht të anonimitetit, nga frika se nëse del haptazi menjëherë do të pasojë hakmarrja me largim nga puna.
Zyrtarët të cilët nuk dëshirojnë të identifikohen theksojnë se ministri Jevtiç, sillet sikurse e tërë ministria të jetë pronë e tij private dhe ata persona të cilët i kundërvihen, i pret shkarkimi.
“Shpenzimi i buxhetit prej 270 mijë euro, ka shkuar duke ndërtuar të shtëpive të banorëve të Shtërpcës, të cilët janë njerëz të dëgjueshëm dhe farefis të ministrit, Jevtiçit”, kanë informuar ata.
Sipas tyre, në Ministrinë për Kthim dhe Komunitete është vendosur një diktaturë ku ndiqet e përgjohet çdo lëvizje e zyrtarëve të atyshëm. Në ambientet e brendshme të ministrisë janë instaluar edhe kamera me të cilat ministri i kontrollon dhe përgjon të gjithë të punësuarit.
Një shtëpi dhe për mikeshën M.A
Dhe një prej burimeve ka thënë konkretisht: “Por kjo nuk është e gjitha, pasi që Jevtiç me para të ministrisë është duke i ndërtuar shtëpinë prej 70 m/katrorë mikeshës së tij M.A, nga Lipjani, e cila nuk është e zhvendosur. M.A përveç shtëpisë në Lipjan ka edhe një shtëpi të saj në qytetin e Kralevës së Serbisë”.
Sipas tij, Ministria për Kthim dhe Komunitete nuk e ka marrë parasysh fare listën e personave që duhet të kthehen e që duhet t’iu ndërtohen shtëpitë, si në fshatin Llapllaselë që gjendet në komunën e Graqanicë, listë kjo që është punuar nga ekspertët e UNHCR-së.
“Jevtiçi, ka futur në listë njerëzit e tij të cilëve iu ka ndihmuar me para, por ka edhe të atillë që tani më iu ka ndërtuar edhe shtëpitë”, ka thënë burimi.
Burimi për të dëshmuar korrupsionin dhe nepotizmin e Ministrit, na ka ofruar edhe një listë të emrave që dëshmon se të gjitha personat përfitues për ndërtimin e shtëpive janë nga Shtërpca, qytet i lindjes së ministrit. /tesheshi.com/
