Drejtori i Përgjithshëm i Twtter-it, Elon Musk, ka kërkuar falje për mënyrën se si ka komunikuar me një punonjës përmes asaj platforme, i cili po përpiqej të zbulonte nëse ishte shkarkuar nga puna, shkruan BBC.
Kërkimi i faljes erdhi pasi punonjësi Haraldur Thorleifsson i shkroi Musk-ut, duke thënë: “Kreu juaj i HR nuk është në gjendje të konfirmojë nëse vijon të jetë i punësuar apo jo”, për të cilin Musk u përgjigj: “Çfarë pune keni bërë?”
Pas një sërë pyetjesh dhe përgjigjesh që shkëmbyen, Thorleifsson tha se mori një e-mail që konfirmonte shkarkimin e tij.
Në një postim në Twitter, Musk e përshkroi atë punonjës si “më të keqin”, por më vonë e fshiu postimin.
Kërkimi i faljes nga Musk
Pas disa orësh ai kërkoi falje. “Dëshiroj t’i kërkoj falje për keqkuptimin tim të situatës së tij. U bazova në gjërat që më thanë se ishin të pavërteta ose, në disa raste, të vërteta, por të parëndësishme. Po mendoj që ai duhet të qëndrojë në Tëitter”, shkroi shefi i Twitter-it.
Në vitin 2021, Thorleifsson shiti agjencinë e tij krijuese “Ueno” në Twitter, por nuk u zbulua se për çfarë shume.
Spekulohet se Twitter do t’i duhet t’i paguajë atij një shumë të majme pas largimit të tij nga kompania. Ai ka distrofi muskulare dhe bëri fushatë në Islandë për qasje më të mirë në karriget me rrota.
Ai i tha BBC-së të hënën se nuk kishte qenë në gjendje të merrte një përgjigje nga Twitter nëse ishte shkarkuar. “Teoria ime është se ata bënë një gabim dhe tani ata po kërkojnë gjithçka që mund të gjejnë për ta portretizuar këtë si një shkarkim të justifikuar për të shmangur përmbushjen e detyrimeve të tyre kontraktuale,” tha ai.
Mbështetje nga ish-kolegët
Sipas mediave lokale, kur ai shiti kompaninë e tij në Twitter, islandezi e strukturoi qëllimisht marrëveshjen për t’i paguar një normë të lartë taksash qeverisë islandeze. Vitin e kaluar, katër media e shpallën atë personin e vitit në Islandë.
Ish-kolegët e mbështetën shpejt Thorleifsson, duke theksuar se ata nuk e kuptonin pse ai u kërcënua me shkarkim. /tesheshi.com/
