Donald Lu ka zhgënjyer pikërisht ato qarqe në politikën shqiptare që vetëm pak muaj më parë e shkarkuan, pas një fushate shumë të egër denigrimi, ndërkohë që pak ditë më parë i përmendën fundin e mandatit.
Dy ditë pas një qëndrimi nga qarqe shumë pranë politikanëve të lartë se Donald Lu i bëri deklaratat për krimin në fundin e mandatit të tij, ambasadori amerikan në Shqipëri i ka zhgënjyer të gjithë.
Ai ka bërë të ditur në një deklaratë të shkurtër në media se ka kërkuar zyrtarisht që të zgjatet mandati i tij në Shqipëri, çka si procedurë ndodh përgjithësisht nëse kërkohet nga një ambasador i rangut të Lu-së.
Megjithatë, diplomati amerikan u ka bërë thirrje “armiqve” të tij se nuk ka shanse shumë për t;u gëzuar.
“Ka qenë një nder i madh për mua dhe familjen time që kemi qenë këtu në Shqipëri në këto dy vite e gjysmë. E kemi shijuar aq shumë mikpritjen shqiptare sa kam kërkuar të qëndroj edhe më gjatë në këtë vend të bukur. Kam në plan të largohem nga Shqipëria në verën e vitit 2018. Deri atëherë, kemi shumë më tepër për të bërë sëbashku”
Pikërisht deklarata se ai është në Tiranë të paktën deri në verën e ardhshme kur priten “gjëra tepër të mëdha”, është një sinjal shumë i qartë.
Po kush janë këto qarqe që kanë folur për mandatin e Donald Lu-së?As më pak e as më shumë por media mjaft afër ish-kryeministrit Sali Berisha dhe LSI-së kanë theksuar pikërisht “fundin e mandatit” pas deklaratës së bujshme për kokat e mafia-s; që u lexua si një mesazh i qartë që “I ka kot deklaratat ai se do të largohet”.
Madje në disa media edhe pranë mazhorancës u bënë komente që “kështu e kanë ambasadorët në fund mandatit”. Një analizë totalisht jashtë çdo realiteti dhe pa asnjë analogji me të vërtetën.
Megjithatë, deklarata e sotme e Donald Lu-së ishte një sinjal i fortë dhe i prerë ndaj atyre që e duan jashtë.
Jo më larg se në fillimin e vitit, sapo Donald Trump bëri betimin, po media që i “caktoi” mandatin Donald Lu-së, e “shkarkoi” edhe me ceremoni, madje së bashku me ambasadorin e SHBA në Shkup, Baily. Natyrisht që nuk ishte e vërtetë dhe tesheshi.com e publikoi e para lajmin në atë kohë, kur të gjithë portalet përsërisnin si papagall një fake news pa referencë.
Ndërkaq, disa ditë më parë, të njëjtat qarqe politike i komentuan krejt ndryshe disa ndryshime në DASH.
Emërimin e Jonathan Moore në vendin e Hoyt Brian Yee, e komentuan si një ndryshim i politikës amerikane, ku Moore si ish-kreu i zyrës për Shqipërinë dhe referuesi bazik për zhvillimet nga Tirana pas ambasadorit, tregon asgjë tjetër veçse një konfirmim të politikës aktuale të DASH.
Pastaj, sjellja në Ballkan, pikërisht në Athinë e të ashtuquajturit “Buldozeri”, Hoyt Brian Yee, nuk është gjë tjetër veçse një sinjal edhe më i fortë për vazhdimin e politikës së fortë në rajon, pra nuk ka ndryshim kursi. Ndërkaq, në vendin e Victoria Nuland është emëruar Wes Mitchell, një republikan i bindur anti-rus dhe ish-këshilltar i Mit Romney-t, kandidatit të moderuar për President të SHBA.
Në mediat amerikane, vendimet e Rex Tillersonit u komentuan si një sfidë ndaj “Skifterëve” të Shtëpisë së Bardhë që pak javë më parë hapën lajme për largimin e Sekretarit të Shtetit.
Në fakt këto gjëra janë një deja’vu. Në qershorin e vitit 2013, një media që lëviste në mes Ilir Metës dhe Sali Berishës, “shkarkoi” edhe ambasadorin e atëhershëm të SHBA-së, Akexandër Arvizu, duke thënë se largohet pas pak ditësh.
Por ky i fundit qëndroi edhe një vit e gjysëm më shumë…/tesheshi.com/
