Adib Javad Joudeh al-Husseini, kujdestar aktual i çelësit të Kishës së Varrit të Shenjtë në Jerusalem, i bëri thirrje bashkësisë ndërkombëtare të mbështeste çështjen palestineze.
“Në Palestinë i referohemi Presidentit Erdogan si “Sulltani” e jo “Presidenti”. Shpresa jonë është që çështja palestineze të zgjidhet dhe paqja të rivendoset”, tha al-Husseini.
Kisha, e njohur edhe si “Kisha e Ringjalljes”, gjendet në Kodrën e Kalvarit të qytetit të Jerusalemit. Çelësi i kishës është mbajtur nga dy familje, Ghodayya dhe Nuseibeh, për 850 vjet.
“Mund të them se zhvillimet më të fundit në Jerusalem, veçanërisht në Bregun Perëndimor, kanë ngjallur një intifadë (kryengritje) të re”, thotë al-Husseini.
“Si mund ta jepte (Presidenti Trump) diçka që nuk është pronë e tij?”, pyet ai duke iu referuar njoftimit të Trump-it javën e kaluar, pavarësisht kundërshtimit nga gjithë bota, që ta njohë zyrtarisht Jerusalemin si kryeqytetin e Izraelit dhe të lëvizë ambasadën e Uashingtonit nga Tel Avivi në qytetin e shenjtë.
Njoftimi nxiti një dënim të fuqishëm nga e gjithë bota, përfshirë Turqinë, BE-në dhe OKB-në.
Ai vazhdoi duke treguar se si palestinezët kishin jetuar në “paqe dhe vëllazëri” nën sundimin osman. “Epoka osmane ishte një periudhë paqeje dhe prosperiteti për ne”, tha ai. “Ne mendojmë se populli turk ndan të njëjtin gjak me palestinezët”.
Lidhur me statusin e të krishterëve në rajon, el-Husseini tha: “Ata janë vëllezërit dhe motrat tona në Jerusalem. Ne i ndajmë të njëjtat emocione, ata thonë çfarë themi ne”.
Sipas al-Husseinit, ai mori çelësin e kishës nga babai i tij kur ishte vetëm 8 vjeç. Që atëherë, thotë ai, hap derën e kishës çdo mëngjes dhe e mbylli atë çdo natë.
Izraeli pushtoi Jerusalemin Lindor gjatë Luftës së Lindjes së Mesme në vitin 1967. Ai i aneksoi të gjithë qytetin në vitin 1980, në një veprim që nuk u njoh asnjëherë nga bashkësia ndërkombëtare.
Jerusalemi mbetet në thelb të konfliktit Izrael-Palestinë, me palestinezët të cilët shpresojnë se pjesa lindore e qytetit të pushtuar mund të shërbejë si kryeqyteti i një shteti të ardhshëm palestinez. /tesheshi.com/
