Kur temperatura fillon të ulet dhe fillojmë të ngrohim hapësirat e shtëpisë, lagështia e ulët dhe shprehitë e dimrit bëhen barrë shtesë mbi lëkurën tonë.
Qëndrimi në ajër të pastër dhe absorbimi minimal i ndriçimit të ditës, janë shumë të rëndësishme për shëndetin në përgjithësi, pra edhe për shëndetin e lëkurës. Në zonat e ngrohta, në përgjithësi ajri është i thatë dhe kjo i kontribuon problemeve me lëkurën në këtë pjesë të vitit. Për shkak të motit të ftohtë, lëkura në dimër bëhet më e ndjeshme se zakonisht.
Ajo reagon me skuqje dhe ngacmueshmëri, qërosje, kruarje të pakëndshme, acarim, një ndjenjë të tensionit dhe të ngjashme. Lëkura bëhet dukshëm më e ndjeshme, kur asaj i mungon mbrojtja natyrore të cilën e ofron shtresa e hidro-lipideve në sipërfaqe të saj. Pa këtë shtresë, lëkura nuk është në gjendje të mbrojë veten kundër ndikimeve agresive të mjedisit.
Disa lloje lëkurash janë më të ndjeshme dhe më të prirura ndaj ndryshimeve të pakëndshme, për shkak të prirjeve të trashëguara, e pjesërisht për shkak të ekspozimit afatgjatë ndaj efekteve të dëmshme të faktorëve të jashtëm. Kur ndodh një ç’ekuilibrim i barrierës natyrore të hidro-lipideve, lëkura nuk mund të mbajë ujin në sipërfaqe të saj; kjo bën që të humbasë butësia dhe elasticiteti. Nëse nuk reagojmë me kohë, lëkura bëhet më e ndjeshme.
Kujdesi i pamjaftueshëm gjithashtu mund të çojë në plakjen e parakohshme të lëkurës dhe rritjen e ndjeshmërisë. Lëkura e thatë që e ka humbur lagështinë dhe yndyrnat, bëhet e ngacmuar. Preparati për kujdes të lëkurës duhet të jetë i zgjedhur me kujdes, sepse, pavarësisht se çfarë shkruan në etiketim, jo të gjitha preparatet për lëkurë të thatë ose të ndjeshme janë të njëjta dhe jo domosdoshmërisht i përshtaten të gjithëve. Ju e njihni më së miri lëkurën tuaj dhe mund të vlerësoni ndryshimet në të dhe si ajo i përgjigjet një lloji të veçantë të përkujdesjes, ose një produkti të veçantë.
Njerëzit me lëkurë të ndjeshme nuk duhet të përdorin sapun të zakonshëm, dhe sigurisht duhet të shmangin ujë të nxehtë, pasi ajo kontribuon në dobësimin e shtresës së hidrolipideve në sipërfaqen e lëkurës. Fytyra nuk duhet fërkuar, por vetëm lehtësisht të preket me peshqir. Të gjitha produktet për kujdesin e lëkurës duhet të veprojnë në thellësi, të përmbajnë sa më pak konservate, aromat dhe shtesa të tjera. Kozmetika natyrore është shoku më i mirë i lëkurës.
Edhe vetë mund të përgatisni maska ushqyese nga ushqimet që keni në kuzhinë, të cilat do të kontribuojnë në ripërtëritjen e lëkurës dhe rezistencën e saj. Vëmendje e veçantë duhet t’i kushtohet buzëve, lëkurës rreth syve e cila është e hollë, e ndjeshme dhe ka shumë pak gjëndra dhjamor, si dhe kujdesit të duarve.
Preparatet për kujdesin e lëkurës nuk duhet të blihen verbërisht duke ndjekur fushatat reklamuese – shumica e asaj që thuhet në lidhje me produkte të caktuara nuk qëndron. Nëse nuk jeni të sigurt për përzgjedhjen e produktit, konsultohuni me ekspertin për këtë çështje. /tesheshi.com/
