Nëse vuani shpesh nga migrena, bëni mirë të mos e nënvlerësoni, veçanërisht nëse jeni femra. Kështu ju këshillon një studim i publikuar në British Medical Journal, sipas së cilit, ata që kanë më shpesh dhimbje koke mund të jenë të rrezikuar nga problemet kardiovaskulare.
“Duhet të jeni të ndërgjegjshëm për lidhjen mes migrenës dhe sëmundjeve kardiovaskulare. Femrat që vuajnë nga dhimbjet e kokës duhet të trajtohen në bazë të rreziqeve që iu kanosen”, – thotë Tobias Kurth, drejtor i Institute of Public Health në Charite Universitatsmedizin të Berlinit.
Studimi ka analizuar 116 mijë gra të shëndetshme nga 25 në 45 vjeçe. Ato kanë qenë nën vëzhgim nga viti 1989 deri në vitin 2011. Gjatë kësaj periudhe 1300 prej tyre janë prekur nga infrakti apo nga iktusi në zemër dhe 223 prej tyre kanë vdekur.
Sipas studiuesve, “femrat që vuajnë nga dhimbja e kokës kishin 50% më shumë rrezik të vuanin nga sëmundjet kardiovaskulare: 39% mundësi më shumë për të pësuar infarkt, 62% për të pësuar iktus dhe 73% rrezik më shumë për të bërë një operacion kirurgjik në zemër”. Megjithatë, kaq nuk është e gjitha. Femrat që vuanin nga dhimbja e kokës “ishin 37% më shumë të rrezikuara për të vdekur si pasojë e një infarkti apo iktusi”.
Studimi shkencor nuk provon një lidhje të drejtë mes migrenës, iktusit dhe infarktit, por kërkuesit shprehen se “ka ardhur momenti që dhimbja e kokës të shtohet në listën e atyre elementëve që mund të parandalojnë në moshë të re problemet kardiovaskulare që do të zhvillohen në vitet më pas”. /tesheshi.com/
