Kush nga bashkëatdhetarët tanë do të udhëtojë sot nëpërmjet aeroportit të Malpensa-s të Milanës me destinacion Shqipërinë, Kosovën, Maqedoninë, Preshevën, Malin e tZi, apo edhe anasjelltas, duhet të jetë i përgatitur që në këtë aeroport do të ketë vonesa të theksuara dhe shtyrje oraresh për avionet e bagazhet, si pasojë e një greve të papritur që kanë vendosur punonjësit e këtij aeroporti.
E përditshmja italiane La Repubblica, njofton se greva nuk ka qenë e paralajmëruar, dhe për pasojë që në orët e mëngjesit udhëtarë të irrituar kanë nisur një revoltë në rrjetet sociale.
Sipas sindikatës së punonjësve të Malpensa-s, është vendosur në orën 7 të mëngjesit që të zhvillohet një grevë, e cila do të vonojë me të paktën gjysëm orë çdo fluturim nga ky aeroport i rëndësishëm i Italisë.
Nga Malpensa udhëtojnë thuajse të gjithë emigrantët shqiptarë që jetojnë në Italinë veriore e qendrorë, por edhe ata që vijnë nga linja tranziti prej vendeve të tjera të Perëndimit.
Siç thekson La Republica, greva 24-orëshe do të shkaktojë problem edhe ditën e nesërme, ndoshta edhe të enjten. /tesheshi.com/
