Tuberkulozi, një infeksion serioz i mushkërive i njohur si “sëmundja viktoriane”, që vret një në gjashtë persona që infekton dhe mund t’ju shkaktojë kollitje gjaku, është sërish në rritje në Angli.
Sipas shifrave zyrtare, numri i rasteve u rrit me 11 për qind deri në fund të vitit të kaluar, duke arritur në 5,000 raste, tregojnë raportet nga Agjencia e Sigurisë Shëndetësore e Mbretërisë së Bashkuar (UKHSA). Kjo do të thotë se rreth një në çdo 25,000 njerëz në Angli ka TB, krahasuar me pothuajse një në 5,000 njerëz në Londër.
Katër nga pesë raste të reja ishin në mesin e njerëzve të lindur jashtë MB, përqindja më e lartë që nga viti 2000. Grupet më të mëdha të njerëzve jo të lindur në Mbretërinë e Bashkuar me TB janë nga India, Pakistani, Nigeria dhe Rumania.
Ekspertët shëndetësorë tani po u bëjnë thirrje njerëzve me simptoma të tuberkulozit që të mos injorojnë shenjat e sëmundjes, të cilat përfshijnë një kollë të vazhdueshme, e cila lehtë mund të ngatërrohet me infeksione të zakonshme të dimrit, si ftohja ose gripi.
Paralajmërimi vjen pasi shifrat e NHS tregojnë se ka pasur një rritje prej 350 për qind të numrit të rasteve të gripit në spitale në Angli, me një rritje prej 86 për qind të norovirusit, si dhe rritje të rasteve të COVID-19 dhe RSV.
Dr. Esther Robinson, shefja e tuberkulozit në UKHSA, po u bën thirrje njerëzve të mos injorojnë simptomat e mundshme të tuberkulozit.
“Tuberkulozi është i trajtueshëm dhe i parandalueshëm, por sëmundja mbetet një problem serioz i shëndetit publik në Angli,” tha ajo.
Megjithëse gripi dhe sëmundjet e tjera të dimrit janë në rritje këtë periudhë të vitit, është e rëndësishme të mbani mend se jo çdo kollë e vazhdueshme, së bashku me temperaturën, shkaktohet nga gripi ose COVID-19. Një kollë që zakonisht ka mukozë dhe zgjat më shumë se tre javë mund të shkaktohet nga një sërë problemesh, duke përfshirë tuberkulozin. Nëse mendoni se mund të jeni në rrezik, bisedoni me mjekun tuaj.
Rritja e numrit të rasteve të tuberkulozit vitin e kaluar shënon një kthesë shqetësuese në numrin e njerëzve që vuajnë nga sëmundja në Britani. Rastet arritën kulmin në më shumë se 8,000 në 2011, por ranë në pak më shumë se 4,000 në 2020, viti i pandemisë COVID-19. Megjithatë, që atëherë numri i rasteve është rritur nga viti në vit.
Gjithashtu, shqetësuese është rritja e përqindjes së rasteve të tuberkulozit që përfshijnë shtame që janë rezistente ndaj barnave që përdoren zakonisht për trajtimin e tyre. Në vitin 2022, rreth një në 100 raste të tuberkulozit ishte rezistent ndaj ilaçeve. Ky numër u rrit në më shumë se një në 50 raste vitin e kaluar.
Simptomat e mundshme të tuberkulozit përfshijnë një kollë që zgjat më shumë se tre javë dhe përmban gjak, temperaturë të lartë, djersitje gjatë natës, humbje oreksi dhe humbje peshe të pashpjegueshme.
Megjithëse testimi i TB është i detyrueshëm për emigrantët nga vendet ku infeksioni është më i zakonshëm, ai mund të mbetet në një fazë latente, që do të thotë se mund të jetë e vështirë për t’u zbuluar.
Në fillim të këtij viti, Organizata Botërore e Shëndetësisë (OBSH) paralajmëroi për një rritje globale të numrit të rasteve të tuberkulozit, i cili arriti një rekord 8.2 milionë raste vitin e kaluar.
Tuberkulozi trajtohet me antibiotikë dhe rrallëherë rezulton fatal. Megjithatë, globalisht, tuberkulozi vlerësohet se vret një në gjashtë persona që infekton dhe vdekja zakonisht ndodh vite pas infektimit.
Tuberkulozi transmetohet me kollitjen dhe teshtitjen e personave të infektuar dhe më së shpeshti shfaqet në mushkëri, megjithëse mund të prekë edhe pjesë të tjera të trupit. Disa studime kanë treguar se ajo mund të përhapet në mënyrë pasive, domethënë njerëzit e infektuar mund ta transmetojnë sëmundjen thjesht duke marrë frymë, edhe nëse nuk kanë simptoma. Simptomat e hershme përfshijnë kollën, ethe, djersitje gjatë natës dhe humbje peshe.
Megjithatë, një infeksion më i rëndë i tuberkulozit mund të çojë në vdekje duke shkatërruar organet e brendshme, duke shkaktuar gjakderdhje të brendshme dhe duke i mbushur organet me lëngje. Tuberkulozi është veçanërisht i rrezikshëm për njerëzit me sistem të dobët imunitar, siç janë ata që i nënshtrohen kimioterapisë, si dhe për fëmijët dhe të moshuarit që përndryshe janë më të ndjeshëm ndaj infeksioneve. Vaksinimi me BCG mbron nga tuberkulozi, por u jepet vetëm personave që janë në rrezik më të lartë nga ky infeksion, shkruan Daily Mail. /tesheshi.com/
