Sipas burimeve turke të sigurisë, kufiri turko-sirian është pastruar të dielën nga forcat e ISIS-it, pasi Ushtria e Lirë Siriane, e ndihmuar nga ushtria turke, mori kontrollin e të gjithë territorit nga Azezi në Xherablus.
Ushtria e Lirisë Siriane mori një sërë fshatrash të dielën, një ditë pasi Forcat e Armatosura Turke hynë në Çobanbej të Sirisë.
Me përkrahjen e ushtrisë turke, luftëtarët sirianë të opozitës kanë krijuar një zonë të lirë nga militantët e ISIS-it përgjatë kufirit turko-sirian, që fillon në rajonin e Azezit e shkon gjer në Çobanbej e Xherablus.
Në më pak se dy javë pas nisjes së operacionit “Mburoja e Eufratit”, është pastruar nga militantët e ISIS-it dhe të YPG-së një zonë prej rreth 600 kilometrash katrorë.
Kryeministri turk, Binali Jëlldërëm, duke folur dje nga Dijarbakëri, deklaroi se, “Kufiri ynë prej 91 kilometrash është plotësisht i siguruar. Të gjitha organizatat terroriste janë zmbrapsur dhe janë larguar.”
Observatori Sirian për të Drejtat e Njeriut pohoi po ashtu se rebelët sirianë, të mbështetur nga tanket dhe avionët turq, kishin marrë një numër fshatrash, duke i dhënë fund pranisë së ISIS-it në kufi. /tesheshi.com/
