Tre anëtarë të ushtrisë indiane, përfshirë një oficer komandues, u vranë në një “përplasje të dhunshme” me ushtarë kinezë në rajonin himalajan të Ladakh, tha një zëdhënës i ushtrisë indiane.
Ai shtoi se incidenti ndodhi të hënën natën pas javëve të përshkallëzimit të tensioneve dhe vendosjes së mijëra trupave shtesë nga të dy palët në rajon.
“Gjatë procesit të de-përshkallëzimit në Luginën Galvan, mbrëmë pati një përleshje të dhunshme në të cilën pati viktima. Një oficer dhe dy ushtarë u vranë në anën indiane”, tha një zëdhënës i ushtrisë indiane në një deklaratë.
“Zyrtarë të lartë të ushtrisë së të dy palëve aktualisht janë duke negociuar për të qetësuar situatën.”
Tensionet thuhet se po përshkallëzohen pothuajse çdo ditë midis dy fuqive rajonale përgjatë kufirit prej 3.500 kilometrash që ata ndajnë, i cili kurrë nuk është demarkuar plotësisht.
Mijëra ushtarë nga dy fqinjët, të cilët janë fuqi bërthamore, janë përfshirë në mosmarrëveshjet e fundit që nga maji në rajonin Ladakh, i cili kufizohet me Tibetin.
Kina, ndërkohë, ka akuzuar Indinë për kalimin e “kufirit të diskutueshëm” midis dy vendeve, sipas AFP.
Zëdhënësi i Ministrisë së Jashtme kineze, Zhao Lijian tha se trupat indiane kaluan kufirin dy herë të hënën dhe se ata “provokuan dhe sulmuan personelin kinez, gjë që çoi në një konflikt të rëndë fizik midis njësive kufitare të dy palëve”.
Javën e kaluar, Kina tha se kishte arritur një “marrëveshje pozitive” me Indinë për zgjidhjen e tensioneve në kufi me ndihmën e kanaleve diplomatike dhe ushtarake. /tesheshi.com/
