Ylli Pata
Negociatat ndërmjet Tiranës dhe Athinës për çështjen e rregullimit të kufirit detar po shkojnë drejt pikës kulmore dhe mësohet se pikërisht kjo çështje ka ngritur shefin e diplomacisë greke të vijë javën e ardhshme në Shqipëri.
Por edhe këtë herë bisedimet janë bërë në mënyrë diskrete duke e mbajtur larg opinionin publik. Nga burime të rëndësishme diplomatike, tesheshi.com mëson se Tirana dhe Athina kanë arritur në një unison që të përcaktojnë menjëherë të ashtuquajturat “Zona ekskluzive Ekonomike” në kufirin detar, hartat e të cilave do të ofrohen nga dy shumëkombëshe të rëndësishme nafte, të cilat janë të interesuar për pasurime e madhe që besohet se ekziston në thellësi të Jonit.
Burimi diplomatik, i tha tesheshi.com se negociatat për detin kësaj here nuk po zhvillohen nga Tirana dhe Athina si në vitin 2009 por nga dy gjigantët e naftës, të cilët janë pajtuar nga vendet përkatëse dhe prej dy vitesh po përplasen me njëra-tjetrën për të përcaktuar kufirin, ku do të nxjerrë naftë njëra e ku tjetra.
“Bëhet fjalë për emra të mëdhenj të energjisë në tregun botëror pasi janë dy nga më të mëdhatë në gjithë planetin, por ju lutem nuk është etike të flasim për mera”, tha diplomati i njohur për tesheshi.com.
Ndërkaq, besohet se studimet paraprake e japin atë zonë si të pasur jo vetëm me naftë, por edhe me gaz natyror.
Bëhet fjalë për damarin e gazit që lidhet edhe me fushat e nxjerrjes që ndodhen në Delvinë.
Ministri i Jashtëm i Greqisë, Nikos Kotzias do të vizitojë Tiranën në 6-7 qershor.
Takimi i tij në ministrinë e jashtme do të bëhet në kuadër të komisioneve të ekspertëve të të dy palëve, të cilat si asnjëherë tjetër do të drejtohen nga titullarët përkatës: Ditmir Bushati dhe Nicholas Kotzias.
Vizitën e fundit në Tiranë ministri grek e ka bërë gati një vit më parë, më 15 korrik 2015.
Ndërkaq ministri i Jashtëm shqiptar, Ditmir Bushati e vizitoi Greqinë një muaj më parë, në kuadër të ministerialit të Selanikut, ku temë kryesore ishte përballimi i sfidave nga kriza e refugjatëve.
Gjatë vizitës së Bushatit në Athinë, Kotzias deklaroi se “Besoj se nëse me Shqipërinë do të tregojmë racionalitet dhe projekte do të zhvillojmë marrëdhënie në mënyrë të shkëlqyer”.
Bushati u përgjigj se dialogu mes dy vendeve është një proces qe bazohet mbi ndërsjelltësinë dhe mbi nevojën për të mbyllur një e nga një të gjitha çështjet që qëndrojnë të hapura prej shumë kohësh.
“Nuk është një proces i lehtë, sepse nuk kemi një çelës të artë për t’i dhënë një zgjidhje universale për të gjithë gamën e problematikës”, u shpreh ministri Bushati gjate takimeve me homologun grek ne vizitën e tij te fundit ne Greqi./tesheshi.com/
