Në konferencën e radhës për shtyp me të njëjtën temë, kufijtë, presidenti i Kosovës Hashim Thaçi sqaroi dhe njëherë formulën për zgjidhjen përfundimtare të çështjes së Kosovës, që sipas tij duhet të finalizohet me njohjen nga Serbia. E kjo është: kompromis me korigjim kufijsh, pasuar nga marrëveshje që çon në njohje.
“Duhet të jemi te vetëdijshëm që këto qëllime nuk mund t’i arrijmë pa perspektivën e fqinjësisë së mirë. BE-ja është duke u modernizuar dhe reformuar, dyert janë te hapura për zgjerim, mirëpo paraprakisht shtetet duhet të zgjidhin problemet e tyre të hapura. Si kusht i domosdoshëm për anëtarësim në BE mbetet ndërtimi i fqinjësisë së mirë”, deklaroi Thaçi.
Më herët, në një takim me një delegacion deputetësh austriakë, Thaçi shpalosi të njëjtin vizion: “Ne po bëjmë përpjekje për arritjen e një marrëveshjeje paqësore me palën serbe në Bruksel. Është shumë vështirë të gjejmë kompromis, por nuk është e pamundshme. Ky kompromis duhet të arrihet për hir të paqes, stabilitetit dhe së ardhmes së përbashkët euroatlantike të qytetarëve dhe vendeve tona”, u tha ayre presidenti kosovar. /tesheshi.com/
