Për çështjen e nxehtë të kufijve mes Kosovës dhe Serbisë, shtruar si çështje për t’u riparë e korrigjuar, si nga Thaçi e si nga Vuciç, është shprehur së fundi dhe Kadare. Shkrimtari i njohur, gjithnjë sensitiv ndaj zhvillimeve kosovare, duke folur për Presheva Jonë, tha se kjo nuk duhet të ndodhë.
“Gjithsesi duhet ruajtur integriteti territorial i shtetit te Republikës së Kosovës dhe çdo pretendim për lëvizje të kufijve apo copëtim të Kosovës nuk do të ishte në favor të paqes dhe stabilitetit në rajon. Shqiptarët dhe serbët, dialog e marrëveshje po në Bruksel, por asesi në dëm të sovranitetit të Kosovës! Askush s’ka të drejtë, Serbia hiç e më hiç, të cenoj integritetin territorial te Republikës së Kosovës. Reciprocitet mes Veriut dhe Luginës së Preshevës meqë këta të fundit nuk janë rehat…”, ka thënë Kadare.
Shkrimtari shfaqi dhe kritikat ndaj faktorit ndërkombëtar, se si po e trajton çështjen e Kosovës.
“Nisur nga historia, vuajtjet e popullit të Kosovës, sot nuk është duke u bërë aq sa duhet për këtë pjesë të Europës. Çdo angazhim për Kosovën nuk mjafton kurrë, sepse ajo e meriton shumë e më shumë…”, u shpreh Kadare. /tesheshi.com/
