Presidenti Meta ka shprehur për herë të parë qëndrimin e tij në debatin e nxehtë për ndryshimin e kufijve mes Kosovës dhe Serbisë, promovuar e mbrojtur në parim nga dyshja Thaçi-Vuçiç. Kreu i shtetit shqiptar, në një intervistë për Albanian Daily News, ka nxjerrë një “Jo” të fortë, duke dhënë argumentin e zakonshëm, atë të “cenimit të stabilitetit” prej një efekti zinxhir.
“Çdo tentativë për të imponuar modele të ndryshimit të kufijve, jo vetëm do të cenonte stabilitetin e rajonit por do të vinte në rrezik edhe frymën dhe parimet e BE-së për të cilat ajo është investuar nga themelimi i saj deri sot. Dialogu Serbi-Kosovë është ndërtuar jo për të ndryshuar realitetin, por për të udhëhequr procesin e pranimit të tij, në emër të paqes e stabilitetit. Ai është parakusht për integrimin evropian të të dy vendeve. Çdo diskutim dhe debat që ndihmon në kuptimin dhe pranimin e këtij realiteti është i mirëpritur. Çdo devijim nga ky realitet, përveçse provokon emocione dhe retorika populiste nuk sjell dobi”, ka thënë Meta. /tesheshi.com/
