Kuba ka dhënë leje për herë të parë pas 56 vitesh për ndërtimin e një kishe në provincën perëndimore të Pinar del Rios. Kisha katolike do të jetë faltorja e parë e ndërtuar që nga revolucioni i 1959-s, dhe kjo ka ngjallur shpresat se pas saj do të pasojë ndërtimi i një xhamie dhe një sinagoge.
Shpenzimet për ndërtimin e kishës do të mbulohen nga sa thuhet prej SHBA-ve. Rreth 36.000 banorë jetojnë në Santino, në qytetin ku do të ngrihet kisha, që veç të tjerash ka dhe një shkollë mjekësie, ku kryejnë studimet mbi 4.000 të huaj, shumë prej të cilëve janë katolikë praktikues.
Mjetet kubaneze të informimit kanë shkruar se pas kishës mund të ndërtohen faltore të tjera.
Në të kaluarën ka patur kërkesa fetare të bëra nga Turqia, Rusia dhe Izraeli, dhe pritet që Kuba t’u japë përparësi dëshirave të këtyre vendeve. Presidenti i Turqisë, Rexhep Tajjip Erdogan, bisedoi me Raul Kastron, drejtuesin e vendit komunist, gjatë vizitës së pak javëve më parë në Amerikën Latine për dëshirën e tij për të ndërtuar një xhami në Kubë, dhe bëri të ditur se mikpritësi u shpreh pozitivisht për projektin e xhamisë. /tesheshi.com/
