Përfaqësuesja e Brazilit vijon të ketë një paraqitje të shkëlqyer në ndeshjet kualifikuese të grupit të Amerikës së Jugut për Botërorin 2018. Vendi i parë mes dhjetë kombëtareve, vetëm një humbje në 13 ndeshje, 32 gola të shënuar, si asnjë tjetër, e 10 të pësuar, po ashtu si asnjë skuadër tjetër.
Në Montevideo janë përballur në nisje të së premtes mbajtësit e dy vendeve të para, Uruguaji ndjekës dhe Brazili kryesues. Një sfidë e fituar nga miqtë, që kanë shfaqur dominimin e tyre.
Uruguaji ka vuajtur mungesën e Muslera-s dhe Suarez-it, dy prej lojtarëve kyç të formacionit. Cavani e
ka bërë të tijën, duke shënuar që në minutën e 9-të me 11-metërsh. Një gol që do të sillte reagimin e brazilianëve, të cilët kanë ditur ta kthejnë erën në anën e tyre. Paulinho do të shënonte një tregolësh, e Neymar gjithashtu do të linte shenjën e vet në fitoren e thellë 1-4.
Argjentina dhe Kili përsëritën finalen e vjetshme të Kupës së Amerikës, me rezultatin të vendosur sërish nga pika e 11-metërshit. Por nëse Messi gabonte verën e shkuar, nuk bëri të njëjtën gjë këtë herë. Karshi Bravo-s, ai shmangu çdo gabim dhe e dërgoi topin në rrjetë në minutën e 16-të.
Fitorja 1-0 e mban Argjentinën në vend të tretë, me një diferencë minimale me skuadrat pasuese.
Në takimet e tjera, Kolumbia fitoi 1-0 ndaj Bolivisë, Paraguaji mposhti 2-1 Ekuadorin, dhe Venezuela e Peruja u ndanë paqësisht, 2-2. /tesheshi.com/
