Mbrëmë janë zhvilluar ndeshjet e para të raundit të tretë kualifikues të Ligës së Europës. Për ndjekësit shqiptarë të futbollit, vëmendja ishte përqendruar në Shkup, në stadiumin “Filipi i Dytë,” aty ku Shkëndija e Tetovës luante ndaj çekëve të Mllada Boleslavit.
Në prani të 10.000 tifozëve, Shkëndija nuk është ndalur as këtë herë, duke fituar 2-0, e duke bërë një hap të madh përpara drejt raundit play-off.
Golat janë shënuar në pjesën e dytë. Stenio Junior dhe Hasani janë realizuesit e tyre.
Rezultati i jep siguri Shkëndijës për ndeshjen e kthimit, që do të luhet më 4 gusht.
Nga takimet e tjera veçojmë ato ku luajnë futbollistë shqiptarë. Lokomotiva e Zagrebit barazoi 0-0 me Vorskllën. Grezda luajti për 89 minuta, e mori një karton të verdhë. Ai do të zëvendësohej nga tjetër shqiptar, Çekiçi, kur loja po shkonte drejt fundit.
Istanbul Bashakshehiri do të barazonte po ashtu pa gola, 0-0, në përballjen me Rijekën në Stamboll. Cikalleshi do të aktivizohej vetëm në pesë minutat e fundit, por pa mundur të ndryshonte diçka në rezultatin përfundimtar.
1-1 përfundoi sfida mes Lucernës dhe Sasuolos. Jahmir Hyka mori një karton të verdhë në minutën e 41-të, për t’u zëvendësuar nëntë minuta pas nisjes së pjesës së dytë.
Az Alkmari fitoi ngushtësisht ndaj PAS Janinës, 1-0. Lojtari i kombëtares së Shqipërisë, Andi Lila, u aktivizua gjatë gjithë lojës. /tesheshi.com/
