Surpriza kanë dhuruar nëntë ndeshjet e së martës të eliminatoreve europiane të botërorit Rusi 2018. Duke nisur nga fitorja e Zvicrës ndaj Portugalisë, te barazimi i Francës me Bjellorusinë, e te ai i Hungarisë me Ishujt Faroe.
Zvicra ka fituar 2-0 ndaj të sapokurorëzuarve kampionë të Europës. Golat kanë ardhur shpejt për vendasit në stadiumin “St. Jakob Park” të Bazelit. Embolo dhe Mehmedi kanë shënuar brenda 30 minutave të para.
Portugezët kanë patur rastet e tyre, por nuk kanë mundur t’i konkretizojnë. E ndjeshme ka qenë mungesa e Ronaldos.
Në fund ka patur dhe një karton të kuq për Granit Xhakën.
Me një formacion të ndryshuar nga ai i Europianit, Franca ka mundur veç të barazojë pa gola në fushë kundërshtare, ndaj Bjellorusisë.
Francezët kanë patur një zotërim të plotë të lojës, siç kanë patur dhe mundësi për të shënuar. Por në fund rezultati nuk ka ndryshuar: 0-0!
Tanimë pa Ibrahimovic-in, Suedia ka barazuar 1-1 me Holandën. Kanë qenë suedezët që kanë kaluar të parët në epërsi në mbarim të pjesës së parë, kur do të shënonte Berg, për të ardhur në 45 minutat e dyta te goli i Sneijder-it.
I çuditshëm barazimi 0-0 mes Ishujve Faroe dhe Hungarisë. Të njëjtët hungarezë që bënë një figurë shumë të mirë në Europian nuk ia dolën të kalojnë një ekip më tepër se modest. Për më shumë, statistikat e ndeshjes flasin për një barazpeshë në thuajse tërë komponentët.
Rezultati më i thellë i takimeve të së martës qe fitorja 5-0 e Bosnjë-Hercegovinës ndaj Estonisë. Dy prej golave u shënuan nga Emir Spahic, ndërsa realizuan dhe Dzeko, Medunjanin dhe Ibisevic.
Më shumë gola pati sfida Bullgari – Luksemburg, e cila përfundoi 4-3. Gjashtë prej golave u shënuan në pjesën e dytë, ndërkohë që e para qe mbyllur 1-0 për bullgarët. Këta qenë me fat, pasi golin e katërt e gjetën në minutën e 92-të.
Me shumë emocion ka qenë minutat mbyllëse në këtë takim. Në të 91-tën minutë ka barazuar shifrat Bohnert për Luksemburgun. Një minutë më pas, Tonev i ka dhënë fitoren Bullgarisë me golin e tij.
Në tre takime të tjera, Andorra ka humbur 0-1 me Letoninë, Belgjika ka fituar 0-3 në Qipro, dhe Greqia ka marrë tre pikë në transfertën e Gjibraltarit, duke fituar 1-4. /tesheshi.com/
