Në të dytën mbrëmje të ndeshjeve europiane për fushatën kualifikuese për në Botëror, Spanja e Italia, dy përfaqësueset që gjenden në grupin G së bashku me Shqipërinë, kanë fituar me të njëjtin rezultat ndaj kundërshtarëve tepër modestë për fuqinë e tyre.
Spanja fitoi 4-0 ndaj Maqedonisë, e me të njëjtin rezultat, 0-4, Italia mposhti Lihtenshtajnin. Spanjollët kryesojnë grupin, me dhjetë pikë, po aq sa ka dhe Italia, por me golavarazh shumë më të mirë. Pas tyre vjen Izraeli me 9 pikë, falë fitores së mbrëmshme ndaj Shqipërisë.
Irlanda fitoi 0-1 në Vjenë ndaj Austrisë, duke udhëhequr në grupin D me dhjetë pikë.
Një tjetër ndeshje e rëndësishme e të njëjtit grup qe ajo mes Uellsit dhe Serbisë, e cila përfundoi 1-1. Madrileni Bale shënoi që në minutën e 30-të, por Mitrovic barazoi pesë minuta para mbarimit të lojës.
Mjaft interesant është bërë grupi I, ku Kroacia i shkaktoi humbjen e parë Islandës. Interisti Brozovic ishte vendimtar me dy golat e tij në fitoren 2-0 në Zagreb.
Turqia mundi 2-0 Kosovën, e Ukraina fitoi 1-0 ndaj Finlandës.
Kroacia e kryeson këtë grup, por në lojë janë dhe Ukraina, Islanda e Turqia. Me nga një pikë, Finlanda e Kosova mbyllin renditjen.
Në një tjetër takim të së shtunës, Gjeorgjia barazoi 1-1 me Moldavinë. /tesheshi.com/
