I trazuar muaj të shkuar nga humbja në finalen e Kupës së Amerikës, Messi do të deklaronte nxitimthi se nuk do të ishte më pjesë e përfaqësueses. Por ai duket të ketë marrë vendimin e duhur kur ka vendosur të rikthehet të luajë për Argjentinën.
Në kuadër të ndeshjeve kualifikuese për Botërorin e Rusisë, mes orëve të fundit të ditës së djeshme dhe orëve të para të ditës së sotme janë luajtur pesë takime në grupin e Amerikës së Jugut.
Argjentina ka patur për kundërshtar Uruguajin, një prej rivalëve më të fortë në kontinentin amerikanolatin. Ylli i ndeshjes ka qenë Lionel Messi, që ka shënuar dhe i ka dhënë fitoren skuadrës së tij.
Takimi ka përfunduar 1-0 për Argjentinën, me golin e vetëm të realizuar nga Messi në minutën e 43-të. Një marrje elegante e topit prej tij me të majtën, një rrotullim jashtë zone, dhe një goditje e topit që nuk ka mundur të pritet nga Muslera. Ekipi pritës ka luajtur gjatë tërë pjesës së dytë me dhjetë lojtarë, pas daljes me karton të kuq të Dybala-së.
Ka surprizuar ndërkaq Kili, fituesi i Kupës së Amerikës, që ka humbur në fushë kundërshtare ndaj Paraguajit. Kjo sfidë është mbyllur 2-1, me golat për Paraguajin të shënuar nga Oscar Romero dhe Da Silva, ndërkohë që për Kilin ka ngushtuar diferencën Vidal.
Më herët ka qenë një tjetër lojtar i Barcelonës që ka spikatur. Pas suksesit në Lojërat Olimpike, Neymar e ka ndihmuar Brazilin të fitojë në këto kualifikuese ndaj Ekuadorit në transfertë.
Neymar ka zhbllokuar rezultatin në minutën e 72-të me një 11-metërsh të kthyer në gol. Gabriel Jesus ka realizuar dy herë të tjera në fundin e lojës, për të vulosur rezultatin 0-3 në takimin midis Ekuadorit dhe Brazilit.
Dy përballjet e tjera kanë patur të njëjtin rezultat: Bolivia ka mposhtur 2-0 Perunë, e po 2-0 ka fituar Kolumbia ndaj Venezuelës.
Argjentina udhëheq me 14 pikë në grupin amerikanolatin me dhjetë skuadra. /tesheshi.com/
