Reali i Madridit shënoi një tjetër rekord teksa u kualifikua për në gjysmëfinalet e Champions League-s. Fitorja 4-2 mbrëmjen e së martës ndaj Bajernit të Mynihut solli arritjen për herë të shtatë radhazi në gjysmëfinalet e kësaj veprimtarie.
Një kualifikim që pati peripecitë e veta, që u duk se po u rrëshkiste nga duart lojtarëve të Realit kur Bajerni do të fitonte 1-2 në 90-minutëshin e rregullt.
Një kualifikim që pati për protagonist një lojtar të vetëm: Cristiano Ronaldo-n.
Nëse rezultati i përgjithshëm i përballjes mes Realit dhe Bajernit është 6-3, merita shkon për portugezin, i cili shënoi pesë gola në dy takimet, dy në të parin e tre në të dytin.
Pos kësaj, ai u bë i pari lojtar që shënon 100 gola në Champions League. 85 prej këtyre golave janë realizuar ndërsa lojtari ka patur të veshur bluzën e Realit, e 15 në kohën kur aktivizohej me Mançester Junajtedin.
Por më protagonisti në fitoren 4-2 të Realit të Madridit ka qenë gjyqtari 41-vjeçar hungarez Viktor Kassai. Dy golat e fundit të Ronaldo-s dhe kartoni i kuq për Vidal-in janë mes vendimeve të tij që kanë sjellë reagime të panumërta.
Janë vetë lojtarët e Bajernit më së pari të cilët kanë reaguar zemërueshëm, të paaftë për t’i përtypur gafat e tij.
Franck Ribery ka postuar në një rrjet social një numër pamjesh nga ndeshja, ku duken qartë pozicionet jashtë loje të Ronaldo-s në shënimin e dy golave në shtesat 15-minutëshe.
“Një vit punë e rëndë, faleminderit arbitër, bravo!” Kjo është fjalia e tij për hungarezin që çuditi me arbitrimin e tij.
“Kjo grabitje nuk mund të ngjasë në Champions League. Ne deshëm të kualifikoheshim, dhe jemi fort të
zemëruar që një ndeshje me intensitet të tillë të mund të vendoset nga gjyqtari. Ai gaboi shumë, dhe kjo na nxori jashtë Europe,” qe reagimi i Vidal-it, nxjerrja jashtë e të cilit u pa që qe e nxituar dhe pati ndikim në humbjen e gjermanëve.
Fitorja dhe kualifikimi i Realit do të mbahen gjatë në mendje, ashtu siç do të diskutohen gjatë vendimet e Kassai-t. Pas arbitrimit të debatueshëm, me shumë vendime të çuditshme, në përballjen mes Barcelonës dhe PSG-së në një të tetat e Champions League-s, që mundësuan dhe kualifikimin e katalanasve, bëhet hera e dytë brenda pak javëve që dy skuadrat e mëdha spanjolle përfitojnë nga gjykimet problematike. /tesheshi.com/
