Ushtria marokene njoftoi se kishte rënë dakord me Izraelin për të forcuar bashkëpunimin ushtarak, duke përfshirë punën e inteligjencës dhe sigurinë kibernetike, pas takimeve të zyrtarëve të sigurisë në Rabat.
Të dy vendet “ranë dakord të forcojnë më tej bashkëpunimin dhe ta zgjerojnë atë në fusha të tjera – puna e inteligjencës, mbrojtja ajrore dhe lufta elektronike”, thuhet në deklaratën e Forcave të Armatosura Mbretërore Marokene pas takimit të parë të komitetit për monitorimin e bashkëpunimit të mbrojtjes marokeno-izraelite mbajtur në Radat.
Takimi dy-ditor diskutoi bashkëpunimin ushtarak duke përfshirë “logjistikën, trajnimin, prokurimin dhe modernizimin e pajisjeve”.
Maroku dhe Izraeli zyrtarizuan marrëdhëniet në vitin 2020 pas marrëveshjeve të ngjashme të Izraelit me Emiratet e Bashkuara Arabe dhe Bahreinin.
Marrëveshjet e ashtuquajtura Abrahamike u ndërmjetësuan nga administrata e Presidentit të atëhershëm të Shteteve të Bashkuara të Amerikës, Donald Trump.
Marrëveshje politike
Marrëveshjes me Marokun i parapriu njohja e sovranitetit maroken nga SHBA mbi rajonin e diskutueshëm të Saharasë Perëndimore në këmbim të rivendosjes së lidhjeve me Izraelin.
Kjo ka shkaktuar shqetësim në Algjerinë fqinje dhe përkrahësit e lëvizjes Polisario, e cila po kërkon një referendum për pavarësinë e Saharasë Perëndimore.
Izraeli nuk e ka njohur zyrtarisht sovranitetin maroken mbi Saharën Perëndimore, pavarësisht presionit nga Rabati për ta bërë këtë.
Në nëntor 2021, atëherë ministri izraelit i Mbrojtjes Benny Ganz nënshkroi një memorandum mirëkuptimi në Rabat për lidhjet e sigurisë me Marokun.
Izraeli dhe Maroku vendosën marrëdhënie diplomatike në një nivel më të ulët në vitet 1990 pas marrëveshjeve të përkohshme të paqes izraelito-palestineze, por këto marrëdhënie u pezulluan pas fillimit të kryengritjes palestineze, intifadës, kundër pushtimit izraelit në vitin 2000. /tesheshi.com/
