Kryeministri britanik Boris Johnson tha në një intervistë për El Pais se ai pa një “analogji të ngushtë” midis presidentit rus Vladimir Putin dhe të ndjerit “fuqiplotë serb” Slobodan Millosheviç, i paditur për krime lufte, raporton France-Presse.
I pyetur nga një gazetar i El Pais – “ju thatë në Dhomën e Komunave se Putin është një kriminel lufte; a duhet Perëndimi të përpiqet ta sjellë këtë kriminel lufte përpara Gjykatës Ndërkombëtare të Drejtësisë, si Millosheviçi apo gjyqet e Nurembergut?”, Johnson u përgjigj:
“Ajo që unë sigurisht besoj është se ka një analogji të ngushtë midis sjelljes së Putinit dhe viteve të fundit të Sllobodan Millosheviçit. Është shumë interesante që të dy liderët kanë qenë në pushtet për një kohë të gjatë”, u përgjigj kryeministri britanik.
Ai kujtoi se si:
“Sllobodan Millosheviçi identifikoi vendlindjen e nacionalizmit serb, në fakt popullin serb, në Fushë Kosovë, dhe ‘frymëzoi’ popullin e tij me këtë ide të gabuar se ata duhet të shpëtohen dhe të çlirohen. Ka një analogji shumë të ngushtë mes këtij gabimi katastrofik dhe atij rus. Presidenti tha të njëjtën gjë për Kievin dhe origjinën e fesë, kulturës dhe qytetërimit rus dhe qëllimet e tij në Ukrainë.
Kur bëhet fjalë për Gjykatën Penale Ndërkombëtare, është puna e tyre”, shtoi ai.
“Duhet të mblidhen provat. Nëse ka prova të përdorimit të municioneve të paligjshme, bombave thërrmuese, armëve me tytë, padyshim që do të duhet të sillen në Holandë,” përfundoi Boris Johnson. /tesheshi.com/
