Në kohën kur presidenti Meta, nën kredon e dëshirës për zgjidhjen e krizës, doli para mediave me një propozim, por që njëherësh sulmoi ndërkombëtarët e qeverinë, përfshirë dhe kryeministrin Rama, ky i fundit ishte në Ministrinë e Rendit për të falenderuar policinë për 30 qershorin.
Aty, Rama do dekoronte dhe simbolin Ina Nuka, policen gishtkëputur në protestat e “Astirit” të mbështetura nga opozita PD-LSI.
“Faleminderit në emrin tim, të qeverisë dhe çdo qytetari të këtij vendi që sot ndihet i çliruar për zgjedhjet e 30 qershorit, i cili hyri në shtëpitë e shqiptarëve mu në prag të vendimit të negociatave.
Mirënjohje dhe respekt për çdo efektiv policie të pagatitur dhe të gatshëm për të reaguar. Mirënjohje për 60 policët e lënduar gjatë gjithë kohës së protestave të dhunshme.
Më vjen mirë që mes jush është edhe simboli i rezistencës, kolegia, mikja juaj dhe mikja ime e cila ra pre e një sulmi. Ina Nuku reagoi menjëherë ndaj një sulmi që i rrezikoi jetën, por nuk shpëtoi dot dorën.
Sot është dita e duhur për t’i dedikuar Inës dhe të gjitha vajzave që shërbejnë në policinë e shtetit me akordimin e yllit të mirënjohjes së kryeministrit të vendit”, tha Rama. /tesheshi.com/
