Kur fotografi suedez, Magnus Wennman vë në gjumë djalin e tij 5-vjeçar, ai e di sa e rëndësishme është që djali të ndihet i sigurtë ndërsa shtrihet në shtrat.
Por, kur ai nisi të fotografojë me mijëra fëmijët që janë arratisur nga lufta në Siri, ai kuptoi se një numër i madh fëmijësh shkojnë për të fjetur të trembur e të tmerruar.
Avancimi i ISIS, së bashku me luftën civile, ka detyruar 10.6 milionë sirianë të largohen nga shtëpitë e tyre që prej marsit të vitit 2011. Shumë sirianë i janë bashkuar fluksit të refugjatëve që kërkojnë azil në Europë, ndërsa të tjerë jetojnë në kampet e refugjatëve në Turqi, Liban dhe Jordani.
Fotografi Wennman ka vizituar kampet e refugjatëve gjatë këtij viti në një projekt për një gazetë suedeze.
“Më prekën shumë fëmijët, ata janë më të pafajshmit”, thotë ai, duke besuar se është e vështirë, në fakt, për njerëzit që nuk kanë lidhje me luftën, të jenë të vëmendshëm ndaj një konflikti që ka vite që zgjat dhe që mund të jetë i vështirë për t’u kuptuar.
“Por, nuk ka asgjë të vështirë për t’u kuptuar tek fëmijët, tek nevoja e tyre për një vend të sigurtë ku të flenë”, thotë ai. “Kjo është e lehtë për t’u kuptuar. Nuk ka asgjë të komplikuar këtu”.
Wennman gjithashtu shkoi në Serbi, Hungari dhe Greqi, duke fotogarfuar sa më shumë fëmijë që mundej për koleksionin “Ku flenë fëmijët”.
“Ata kanë humbur gjumin”, vëren Wennman. “Eshtë shumë për një fëmijë të mos jetë më fëmijë e të mos argëtohet, edhe në vendet më të këqija”.
Një moment mbresëlënës nga udhëtimet e Wennman ishte mbërritja në Hungari në ditën që ky vend mbylli kufijtë. “Ata ngritën një gardh metalik katër metra të lartë”, tregon ai. “Të shihje ata që kishin mbërritur shumë vonë, të bllokuar pas gardhit dhe kaq të dëshpëruar, ishte zemërthyese. Fëmijët po flinin jashtë dyerve të Hungarisë”.
Koleksioni i fotografive u shndërrua në një punë unike, si pjesa më e madhe e punëve të Wennman, i cili ka vizituar gjithë botën me projekte të ndryshme.
“Të mësojnë të ndrydhësh ndjenjat dhe të përdorësh kamerën si mbrojtje”, thotë ai. Por të fotografoje imazhet përndjekëse dhe te qeta të fëmijëve sirianë të prekur nga lufta e bëjnë këtë eksperiencë shumë të ndryshme.
“Këtë herë, ky projekt ishte vërtet personal”, shprehet ai. “U përpoqa t’i bëj këto fotografi me shumë respekt dhe shpresoj që kjo të dallohet”.
Përgatiti: Juli Prifti- /tesheshi.com/
