Fansat e këngëtarit të njohur spanjoll, Julio Iglesias po bëhen gjithnjë e më të shqetësuar, teksa po qarkullojnë raporte për përkeqësimin e shëndetit të tij.
Gjatë një emisioni televiziv në Argjentinë, drejtuesit diskutuan për shëndetin e këngëtarit, duke lënë të kuptohet se një dëmtim i vjetër nga një aksident automobilistik në vitin 1962 po i shkakton atij dhimbje të konsiderueshme, duke e vënë atë në karrige me rrota. Gjithashtu, u raportua se ky lëndim ka ndikuar negativisht në shëndetin e tij mendor.
Gazetarja Cora Debarbieri, e ftuar në emision, ka treguar se Iglesias ka pësuar një aksident të rëndë në moshë të re që kërkonte ndërhyrje në shtyllën kurrizore. Kjo ngjarje e mundoi atë me dhimbje kronike dhe vështirësi të ndryshme gjatë gjithë jetës së tij.
Matías Vázquez, një tjetër drejtues i emisionit, shtjelloi më tej gjendjen e këngëtarit, duke u shprehur se ai e ka të vështirë jo vetëm të lëvizë, por edhe harron gjërat. “Fatkeqësisht, Julio Iglesias ka arritur në pikën që nuk i kujton më këngët e tij”, tha ai.
Përveç kësaj, Vázquez tha se këngëtari 79-vjeçar, i cili ka shitur më shumë se 300 milionë disqe në të gjithë botën në 14 gjuhë dhe ka publikuar 80 albume, është izoluar, duke ndërprerë kontaktin e drejtpërdrejtë me shumë nga miqtë e tij.
Debarbieri shprehu shqetësimin për situatën, duke thënë se njerëzit që dikur kanë qenë të afërt me Julio Iglesias tani e kanë të vështirë ta gjejnë atë, pasi ai shpeshherë nuk iu përgjigjet telefonatave. Kjo shton më tej shqetësimet rreth shëndetit të tij.
Por sipas një raportimi të gazetës katalanase La Vanguardia, artisti spanjoll Ramon Arcusa i cili është mik i ngushtë i Julio Iglesias mohon informacionin e transmetuar nga emisioni “A la tarde” duke thënë: “Po çfarë marrëzi është kjo? Unë flas shpesh me të dhe kjo nuk është e vërtetë. Ai është i kthjellët si gjithmonë”.
Në të njëjtën kohë, Juan Alberto Mateico, një prezantues i njohur televiziv dhe gjithashtu mik i Iglesias, në një postim në rrjetet sociale, të cilin më pas e fshiu: “Çfarë po ndodh Julio? pse kaq shumë heshtje? Kjo është arsyeja pse kaq shumë spekulime, Jorge Real tha se Puma Rodríguez, duke u larguar nga shtëpia juaj, konfirmoi se ju pa në një karrocë. Njeri, të sugjeroj të dalësh dhe të tregosh fytyrën, njerëzit më pyesin duke ditur për miqësinë tonë dhe unë them se nuk di asgjë, çfarë po ndodh Julito?”. /tesheshi.com/
