Në një intervistë që ende nuk është publikuar, Cristiano Ronaldo ka zbuluar plotësisht se ku është ndjerë më mirë gjatë karrierës së tij të pasur në të cilën ka fituar titullin e një prej futbollistëve më të mirë të të gjitha kohërave.
Futbollisti portugez ka dhënë indikacione të qarta se ku e sheh veten në të ardhmen. Nuk është sekret që ditët më të mira të karrierës së tij ai i kaloi te Real Madrid dhe tani këtë e ka konfirmuar në një intervistë me gazetarin spanjoll Eduardo Aguirre.
Intervista me Aguirre nuk do të publikohet deri të hënën e ardhshme, më 3 shkurt, por pjesë të saj tashmë po qarkullojnë në rrjetet sociale, prej të cilave më së shumti vëmendjen ka tërhequr komenti për Real Madridin.
Ronaldo ka paralajmëruar një rikthim të mundshëm në Madrid kur të përfundojë karrierën e tij, e cila aktualisht është duke u zhvilluar në Arabinë Saudite dhe së shpejti po i vjen fundi.
“Kthimi në Santiago Bernabeu? Ndoshta pas përfundimit të karrierës sime mund të arrijmë një marrëveshje. Ky ishte vendi ku isha më i lumtur në aspektin futbollistik”, tha qartë Ronaldo.
Sigurisht, një koment i tillë gudulisi imagjinatën e tifozëve të “Mbretërve”, të cilët në rrjetet sociale nuk e fshehin krenarinë dhe dëshirën që portugezi të kthehet në Madrid, shkruan AM Sport. /tesheshi.com/
