Ekonomisti i shquar Abdalla Hamdok është betuar si kryeministri i ri i Sudanit, duke udhëhequr kabinetin kalimtar të vendit. Ky ndryshim erdhi pas disa muaj pas protestash masive që detyruan largimin e presidentit autoritar, Omar al-Bashir.
Emërimi zyrtar i Hamdok erdhi disa orë pas betimit të anëtarëve ushtarakë dhe civilë të trupit qeverisës të sapoformuar.
I përbërë nga gjashtë civilë dhe pesë anëtarë të forcave të armatosura, Këshilli Sovran do të qeverisë vendin për pak më shumë se tre vjet deri sa të mbahen zgjedhjet.
Kryeministri i ri u zotua të punojë për t’i dhënë fund krizës ekonomike të vendit dhe vendosjes së paqes.
Ekonomist i respektuar
Hamdok ka më shumë se 30 vjet përvojë si ekonomist dhe analist i politikës, i specializuar në zhvillimin ekonomik në të gjithë Afrikën.
Ai ka diplomë shkencore nga Universiteti i Khartoumit dhe një doktoraturë në studime ekonomike nga Universiteti i Mançesterit në Mbretërinë e Bashkuar.
Nga viti 1981 deri në 1987, ai ishte një zyrtar i lartë në Ministrinë e Financave dhe Planifikimit Ekonomik të Sudanit, përpara se të merrte një numër rolesh drejtuese në disa institucione të ndryshme duke përfshirë Bankën Afrikane të Zhvillimit dhe Organizatën Ndërkombëtare të Punës.
Ai shërbeu për herë të fundit si Zëvendës Sekretar ekzekutiv i Komisionit Ekonomik të Kombeve të Bashkuara për Afrikën, një post të cilin e mbajti që nga nëntori 2011.
Emërimi i Hamdok si kryeministër sinjalizon synimin e udhëheqjes së re sudaneze për të adresuar një krizë kronike financiare që shkaktoi mitingje masive antiqeveritare.
Analistët kanë thënë që përvoja e Hamdokut dhe lidhjet e tij në organizmat ndërkombëtarë mund të ndihmojnë që Sudani të hiqet nga lista amerikane e sponsorizuesve shtetërorë të terrorizmit dhe t’i mundësojë vendit qasje në financime nga FMN dhe Banka Botërore. /tesheshi.com/
