Rrufe në qiellin e hapur bavarez. Në mënyrë të habitshme për shumicën e tifozëve, Bajerni bën një lëvizje surprizë dhe vendos në krye të skuadrës, trajnerin Jup Hejkens.
“Plaku fitues” ishte tërhequr nga futbolli, por drejtuesit e klubit, e veçanërisht presidenti Hënes, e kanë bindur të rikthehet në krye të pankinës së kampionëve të Gjermanisë.
Të përditshmet “Kicker” dhe “Bild” njoftojnë se Hejkens e ka pranuar rikthimin, por kjo zgjedhje do të jetë deri në fund të sezonit, pasi sezonin tjetër, është projektuar Julian Nagelsman i Hofenhaimit, një dëshirë e vazhdueshme e klubit.
Zgjedhja e papritur e Hejkens, që ka mbushur 72 vjeç, është pritur shumë mirë edhe nga tifozeria e Bajernit, pasi të gjithë kujtojnë tripletën e fituar nga bavarezët në sezonin 2012 – 2013, kur skuadra drejtohej prej tij. Po kështu, emri i Hejkens mbeti krahasimi për punën e secilit trajner që e pasoi, pasi çfarë arriti ai me Bajernin, ende nuk e ka përsëritur njeri.
Sigurisht, tek “plakushi” drejtuesit e Bajern shohin edhe shuajtësin e polemikave, si edhe rikthimin e regjimit “gjerman”, për një skuadër që ka filluar të luajë “ndryshe” nga ç’është mësuar. /tesheshi.com/
