Fytyra i është skuqur dhe fryrë deri në atë pikë saqë nuk arrin dot as të hapë sytë. Kjo është fotografia e publikuar në Twitter e 21-vjeçares Emily Petrozza nga Newington në Connecticut.
Vajza duket sikur është rrahur, por në të vërtetë bëhet fjalë për një reaksion alergjik. Emily e dinte se ishte alergjike ndaj maceve dhe edhe herë të tjera kishte pësuar kriza reaksioni, por jo në këtë gjendje. Pasi vuri re këtë fryrje në fytyrë, ajo u alarmua.
Vajza kushte shkuar të bënte një shëtitje me miqtë e saj kur vuri re simptomat e para, por sapo u kthye në shtëpi, situata u përkeqësua. “Nuk njihja më veten. I kisha sytë aq të enjtur saqë më dhembnin nëse i mbaja hapur për një kohë shumë të gjatë”. – ka thënë vajza për Metro, ndërsa ishte shtruar në spital.
Ishte një situatë e vështirë, por gjithçka u vu nën kontroll. Duke dashur të bënte një shaka, motra e saj i bëri një fotografi në atë gjendje dhe e postoi më pas në rrjetet sociale. Brenda shumë pak orëve, fotografia mori mbi 27 mijë shpërndarje dhe në rrjet nisën të krijoheshin meme me fytyrën e vajzës.
Emily iu nënshtrua analizave të shumta dhe zbuloi se në të vërtetë, faji i asaj që ndodhi nuk ishte i maceve, por i një reaksioni që ishte shkaktuar nga një vaj, i cili kishte hyrë në kontakt me qepallat dhe nëse nuk do të ishte kapur në kohë, mund t’i kishte shkaktuar edhe dëme me shikimin. /tesheshi.com/
