Reshjet e dendura të shiut, të cilat kanë prekur rajonin verior dhe lindor të vendit tonë kanë sjellë disa probleme në Rrugën e Kombit si dhe në qarkun e Dibrës.
Në segmentin rrugor Kukës-Kalimash, pati vështirësi të lëvizjes së automjeteve edhe për shkak të erërave të forta dhe rrezes së ulët të shikimit. Punonjësit e kompanisë mirëmbajtëse punuan për pastrimin e rrugës, ndërsa apeluan tek drejtuesit e automjeteve për kujdes gjatë udhëtimit për shkak të pikave të rrezikshme të këtij segmenti, ku rreziku i rrëshqitjes së dherave dhe gurëve është gjithnjë i pranishëm.
Reshjet e dendura të shiut kanë sjellë probleme edhe në Qarkun e Dibrës.
Në rrugën nacionale Bulqizë-Peshkopi, në vendin e quajtur Krajkë, ka patur rrëshqitje dherash dhe gurësh që kanë bllokuar qarkullimin në njërin sens për rreth dy orë, duke rrezikuar kështu edhe drejtuesit e automjeteve.
Në vendngjarje ka shkuar fadroma e firmës së mirëmbajtjes, që ka bërë të mundur largimin e dherave nga traseja duke e bërë atë të kalueshme për automjetet. Rënie gurësh ka patur përsëri në segmentin e rrugës së Arbrit, Bulqizë-Qafë e Buallit. /tesheshi.com/
