Spanja ka rënë më në fund nga froni. Italia ka marrë shpagim për atë humbje të thellë të para katër viteve, duke eliminuar skuadrën favorite të këtij kampionati.
2-0 kanë fituar italianët në një ndeshje me dy fytyra. Në 45 minutat e para kemi parë një Spanjë të ngjashme me atë të Botërorit të Brazilit, e paaftë për të bërë përpara, gjithmonë në alarm në prapavijë, e me lojtarë që duken se nuk kanë luajtur ndonjëherë bashkë.
Chiellini do ta kalonte Italinë në epërsi në minutën e 33-të, por goli mund të kishte ardhur shumë më herët. Italianët krijuan raste të panumërta, ndërsa çdo top i tyre e pështjellonte mbrojtjen spanjolle. De Gea do të kishte meritën për mbajtjen e Spanjës në lojë, duke kryer një sërë pritjesh.
Në pjesën e dytë u pa një Spanjë tjetër, më kërkuese, dëshpërimisht në kërkim të golit. Por gjithsesi pa një mendim të qartë në sulm. Morata nuk ngjante aspak me atë të ndeshjeve të shkuara, e po ashtu pak u pa nga klasi i Iniesta-s dhe David Silva-s. E çuditshme qe se teksa krosimet në zonën italiane krijonin panik e pasiguri, spanjollët ktheheshin të luanin me lojën e shtruar, karakteristikë e tyre.
Çasti më kritik i lojës do të ishte aty nga fundi, kur Buffon pret mjeshtërisht një top të goditur nga afër prej Pique-së. Një kundërsulm më pas, në minutën e 91-të, dhe Pelle ka thelluar rezultatin.
Gjithçka merr fund: 2-0! Italia kualifikohet dhe përballet me Gjermaninë në çerekfinale. Ndërsa Spanja elimimohet dhe i jep fundi një cikli dhe në Europianet. Me gjasa kjo do të jetë dhe ndeshja e fundit e Del Bosque-s si trajner i spanjollëve. /tesheshi.com/
