Mensur Krasniqi
“Maratonë”, kështu mund të quhet qëndrimi dhe puna e anëtarëve të KSHZ-së në Maqedoni, pas shqyrtimit katërmbëdhjetë orësh të parashtresave të dorëzuara nga partitë politike për zgjedhjet e parakohshme parlamentare. Filluan në orën 12 në mesditë dhe puna e tyre vazhdoi thuajse deri në orën 4 të mëngjesit.
Ky komision sot në mesditë duhet ta vazhdojë seancën e shqyrtimit të parashtresave të mbetura. Ata duhet të prononcohen për parashtresa tjera të dorëzuara nga Koalicioni i udhëhequr nga LSDM-ja.
Deri më tani, KSHZ i refuzoi shtatë parashtresa nga Lëvizja BESA dhe tri parashtresa të shtruara nga Koalicioni i kryesuar nga LSDM-ja.
Për një parashtresë të Lëvizjes BESA, e cila ka të bëjë me një vendvotim në Gostivar KSHZ kërkoi ekspertizë grafologjike të nënshkrimit të një votuesi për të cilin është përcaktuar se ka pasur përpjekje për të votuar për herë të dytë.
Në ndërkohë nuk u pranuan as parashtresat e LSDM-së për vendvotimet 2010 dhe 2025 në komunën e Tearcës, ndërsa pas ekspertizës së bërë në materialin zgjedhor për vendvotimin 2024 u përcaktua se numri i votave dhe i fletëvotimeve të pavlefshme përkon me numrat në procesverbal, me ç’rast edhe kjo ankesë u refuzua.
Për parashtresën për vendvotimin 2016 u thirr një anëtar i Këshillit zgjedhor, por me kërkesë të KSHZ-së sot në seancë duhet të vijnë edhe anëtarët e tjerë të këshillit zgjedhor me qëllim që ta konfirmojnë procesverbalin zgjedhor. Komisioni e shqyrtoi edhe parashtresën e vendvotimit 2011 ku pohohet se ka munguar një fletëvotim dhe se është zbatuar i ashtuquajturi treni bullgar.
Me qëllim që të përcaktohen faktet, janë marrë në pyetje anëtarët e këshillit zgjedhor dhe të Komisionit Komunal Zgjedhorë, ku është bërë edhe shqyrtim i materialit zgjedhor ku kërkohej që procesverbali të bëhet para fillimit të votimit.
Mbrëmë para hapësirave të Komisionit Shtetëror të Zgjedhjeve derisa sa zgjati seanca u tubuan qytetarë që të shprehin protestë, për siç thanë, të parandalojnë të merret vullneti i shumicës së votuesve.
Dhe e gjithë kjo sipas analistëve politik ishte formë e presionit ndaj anëtarëve të KSHZ-së, të cilën kreu i VMRO-së po e ushtron nëpërmjet popullatës, në mënyrë që KSHZ në asnjë mënyrë mos të pranojë çfarëdo qoftë ankese për ndryshimin e rezultatit në disfavor të partisë së tij. /tesheshi.com/
