Skulptura e kryqit me drapër e çekan që iu dha dhuratë papa Franceskut në Bolivi ka shkaktuar polemika mes komentatorëve katolikë. Papës iu dha kjo dhuratë që kombinonte simbolet katolike dhe ato komuniste nga presidenti i majtë i Bolivisë, Evo Morales.
Një arkipeshkv katolik tha se Morales kërkoi të “manipulojë Zotin”. Pas raportimeve se Papa ishte zënë në befasi nga dhurata, Vatikani ka hedhur poshtë polemikat.
Kryqi bazohej në një dizenjim të Luis Espinal, priftit jezuit të vrarë në vitin 1980 nga milicia e krahut të djathtë.
Ministrja e Komunikimit të Bolivisë, Marianela Paco, i tha radios bioliviane: “Drapëri përfaqëson fshtarin, çekani përfaqëson punëtorin, duke përfaqësuar kështu njerëz të thjeshtë, njerëz të Zotit”. Ajo shtoi se nuk kishte asnjë motiv tjetër pas dhuratës.
Shumë është folur e shkruar për shprehjen e fytyrës së Papës kur mori dhuratën. Ka disa interpretime të mendimeve të Franceskut për të.
Ka raportime që thonë se Papa u vu në siklet e i tha Morales: Kjo nuk është e mirë.
Por zëdhënësi i Vatikanit, Federico Lombardi tha se Papa ka më shumë mundësi të ketë shprehur çudi me origjinën e dhuratës.
“Nuk besoj se do ta vendosja këtë symbol në altarin e ndonjë kishe kudoqoftë”, ka shtuar ai.
Vetë Papa është akuzuar nga disa qarqe se ka prirje marksiste pasi ai u shfaq shumë kritik ndaj kapitalizmit dhe pabarazisë. Një nga reagimet më të forta erdhi ndërkaq nga arkipeshkvi spanjoll
Jose Ignacio Munilla, I cili shkroi në Twitter: “Niveli i arrogancës është i tillë sa të manipulojë Zotin në shërbim të ideologjive ateiste”. /tesheshi/
