E dini se kush do ta drejtojë misionin e vëzhguesve të zgjedhjet vendore të 21 qershorit në Tiranë? Një britanike që ka vëzhguar dy palë votime shqiptare: Zgjedhjet e 26 majit 1996 dhe zgjedhjet parlamentare të qershorit të vitit 2009. Por në atë vit misioni i saj u dublua fuqishëm nga Asambleja Parlamentare të OSBE-së që drejtohej nga austriaku Wolfgang Grosruck, i akuzuar nga opozita e saj kohe se zbuti disa nga gjetjet e monitorëve.
ODIHR-i ja ka besuar për të dytën herë këtë detyrë, pavarësisht se ardhja e saj në vitin 2009 shkaktoi një përplasje të fortë me autoritetet shqiptare të kohës.
E djathta në pushtet nuk e kishte harruar klimën e vështirë që ishte krijuar me vëzhguesit ndërkombëtarë në zgjedhjet problematike të vitit 1996, ndërsa e kishte konsideruar “jo realist” raportin e atëhershëm të ODIHR-it, që drejtohej pikërisht nga zonja Glover.
Këtë herë ambasadorja Glover pritet të jetë në krye të 24 vëzhguesve afatgjatë dhe afër 250 vëzhguesve afatshkurtër. Të paktën, ky është numri që i është kërkuar vendeve anëtare të OSBE-së që të kontribuojnë.
