Një maratonë e veçantë pritet të startojë së shpejti, ajo ndërkufitare mes Gjakovës dhe Bajram Currit, e gjatë 42 km. Kjo është bërë me dije nga kryetarja e komunës së qytetit kosovar, Mimoza Kusari-Lila, gjatë një takimi me homologun e saj tropojan, Besnik Dushaj.
Kjo maratonë pritet të zhvillohet në datën 14 shkurt (nuk është sqaruar nëse ka lidhje me ditën e të dashuruarve si rit sportivo-atdhetar), ku siç sqaroi Kusari-Lila, njëherësh do promovohet dhe i ashtëquajturi “shteg i maratonës” mes bukurive të apleve shqiptare, për t’u njohur më pas ndërkombëtarisht dhe për t’u renditur tek maratonat e tjera evropiane me emër.
Kusari-Lila tha gjithashtu se ndihej e privilegjuar që ishte shpallur “Qytetare Nderi” nga bashkia e Tropojës, dhe diskutoi me homologun Dushaj mbi të gjitha projektet e përbashkëta të dy zonave dhe qyteteve në bujqësi, turizëm e të tjera fusha ndërveprimi. /tesheshi.com/
