Autokolona në mes të së cilës gjendej kryetari i partisë më të madhe të opozitës në Turqi, CHP-së, Partisë Popullore Republikane, u sulmua sot nga militantët e PKK-së ndërsa lëvizte në provincën verilindore të Artvinit.
Kjo ishte hera e parë që PKK-ja përpiqej të sulmonte një udhëheqës politik. Shkëmbimi i zjarrit ndodhi pranë fshatit Janëkllë, dhe një ushtar në mbrojtje të autokolonës humbi jetën, ndërsa dy të tjerë u plagosën.
Forcat speciale e rrethuan makinën e liderit të opozitës dhe iu përgjigjën zjarrit. Gjatë shkëmbimit të zjarrit u vra dhe një militant i PKK-së që ishte përgatitur ta godiste autokolonën me raketë.
Kryetari i CHP-së, Kemal Këllëçdarogllu, foli për një televizion informativ, duke treguar se ishte në gjendje të mirë e në një vend të sigurt. Ai nuk e anuloi programin e partisë së tij pas sulmit të armatosur.
Ministri i Brendshëm turk deklaroi se sulmi u krye nga PKK-ja, duke thënë se grupi terrorist ishte aktiv në atë rajon. /tesheshi.com/
