Një ditë pas deklaratës së kreut të Bashkimit Demokratik për Integrim, Ali Ahmetit, ku një ndër arsyet se përse është kundër mbajtjes së zgjedhjeve gjatë muajit qershor, ka përmendur edhe muajin e ramazanit, meqë sipas tij BDI-ja respekton agjërimin, vjen reagimi i parë nga kryetari i Shoqatës së Gazetarëve në Maqedoni, Naser Selmani.
Selmani, në profilin e tij facebook ka përgënjeshtruar Ahmetin, meqë sipas tij BDI këmbëngul të mos shtyhen zgjedhjet në mënyrë që të zbatojë urdhërin e shefit të tij, Nikolla Gruevskit, dhe jo se ka dert muajin e ramazanit.
Për Selmanin, Ahmeti është një marksist-leninist i përbetuar, dhe se gjitha arsyet tjera për mos shtyerje të zgjedhjeve janë mashtrime klasike. Në vazhdim e keni postimin e plotë të Naser Selmanit:
“Ka vetëm një arsye pse BDI-ja këmbëngul që zgjedhjet të mbahen me 24 prill. Është urdhër i Nikolla Gruevskit, prandaj Ali Ahmeti duhet ta zbatojë. Ngutja, është strategji e pushtetit, për të shkuar në zgjedhje pa përmbushur kushtet e nevojshme për zgjedhje të lira dhe të ndershme. Sa më pak kushte të plotësuara të dala nga marrëveshja politike e Përzhinës, aq më shumë ka mundës që pushteti të manipulojë zgjedhjet. Nga ana tjetër, BDI-ja e kupton se opozita shqiptare, do të forcohet nëse do të ketë ka më shumë kohë në dispozicion për t’i konsoliduar radhët e saj. Arsyet tjera, që përmend Ahmeti për mbajtjen e zgjedhjeve me 24 prill, siç janë, Samiti i NATO-s në qershor dhe Ramazani, nuk qëndrojnë dhe janë mashtrime klasike. Nuk bëhet anëtarë i NATO-së, vendi ku qeveria nuk mund të organizojë zgjedhje të lira dhe të ndershme.
Ramazani është arsye tjetër joserioze për të mos shtyrë zgjedhjet, sepse Ali Ahmeti është marksist-leninist i përbëtuar. Ideologjia e tij, fenë e trajton si opium për popullin, prandaj në këtë rast ramazani është keqpërdorur për qëllime elektorale.
Kriza me refugjatët nuk mund të jetë arsye që zgjedhjet të mbahen me 24 prill sepse për këtë çështje askush nuk e pyet BDI. Kriza e refugjatëve mund t’i shërbejnë si alibi vetëm ish kryeministrit Grevskit për të arsyetuar rikthimin e tij në krye të qeverisë, kuptohet nëse VMRO i fiton zgjedhet.
I vetmi argument që përmend Ahmeti, për të cilin ia vlenë të diskutohet është përshkallëzimi i tensioneve. Ky argument duhet të kuptohet drejtë si kërcënim i pastër drejtuar opozitës dhe të gjithë atyre që kundërshtojnë mbajtjen e zgjedhjeve pa plotësuar kushtet e nevojshme.
Njëkohësisht, ky argument shantazhon edhe faktorin ndërkombëtarë, duke i dërguar porosi mes rreshtash se nëse zgjedhjet nuk mbahen me 24 prill, pushteti mund të shkaktojë incidente. Kjo duhet të merret me seriozitet, sepse në të kaluarën kemi qenë dëshmitarë të skenareve të ngjashme, për të cilat në opinion janë akuzuar VMRO dhe BDI, për të shpërqëndruar vëmendjen e opinionit dhe për të ruajtur pushtetin, bile nëse ka nevoje, edhe duke inskenuar incidente ndëretnike me pasoja tragjike.
Besoj se koha kur VMRO dhe BDI kërcënojnë dhe shantazhojnë ka perenduar!”, ka shkruar Naser Selmani, kryetar i SHGM-së në Maqedoni. /tesheshi.com/
