Deputeti Veton Berisha, njëherësh kryetar i Partisë Liberale Egjiptiane të Kosovës, në kuadër të lobimit për pranimin e Kosovës në UNESCO, përmes një letre drejtuar zotit Mohamed Sameh Amr, ambasador dhe i deleguar permanent i Egjiptit në UNESCO, i ka kërkuar këtij vendi votën pro.
“Me anë të kësaj shkrese e kam njoftuar z.Sameh se vota pro ndaj pranimit të Kosovës në UNESCO është votë të cilën e mirëpret edhe komuniteti egjiptian i Kosovës, dhe kjo votë garanton se futja e Kosovës në UNESCO është e drejtë legjitime dhe e pakontestueshme. Nëpërmjet kësaj letre e njoftuam z. ambasador se edhe ne, si komunitet jo në shumicë në Kosovë, dhe si shoqëri në tërësi, kemi nevojë për mundësi në edukim, shkencë, kulturë, liri të shprehjes, dhe e gjitha kjo nuk mund të arrihet nëpërmjet izolimit, por nëpërmjet gjithëpërfshirjes,” thuhet në një njoftim. /tesheshi.com/
