Skuadrat e kreut të renditjes në kampionatin italian kanë fituar të tëra në mesjavë, në ndeshjet e vlefshme për javën e njëzet e tretë.
Kryesuesit e Napolit kanë marrë tre pikë në Romë ndërsa kanë triumfuar ndaj Lacios së pafuqishme. Shënuesit e dy golave në fitoren 0-2 për miqtë ishin Higuain dhe Callejon.
Juventusi ka arritur fitoren e 13-të radhazi në Serie A, duke mposhtur mbrëmë Xhenovën me rezultatin e ngushtë 1-0. Rezultati është zhbllokuar nga një autogol i De Maio-s në minutën e 30-të.
Një fitore të vuajtur siguroi dhe Fiorentina ndaj Karpit. U duk se ndeshja po shkonte drejt barazimit zhgënjyes për vendasit, kur Zarate i sapoardhur tundi rrjetën kundërshtare në minutën e 93-të. Fitorja 2-1 e mban Fiorentinën në vend të tretë.
Tre pikë pati mbrëmë dhe për Interin, që ndonëse e dominoi ndeshjen ndaj Kievos, shënoi vetëm një gol. Në takimin e mbyllur 1-0, shënuesi i golit të vetëm qe Ikardi. Suksesi i mbrëmshëm ishte i nevojshëm për të ngritur moralin e skuadrës pas humbjes së thellë me Milanin në fundjavë.
Kampionati italian vazhdon të kryesohet nga Napoli me 53 pikë, i ndjekur nga Juventusi me dy pikë më pak. /tesheshi.com/
