Kina, Rusia, Irani dhe terrorizmi ndërkombëtar janë kërcënimet më të mëdha të sigurisë për Britaninë, njoftoi të martën agjencia britanike e inteligjencës së jashtme MI6.
Shefi i MI6 Richard Moore tha se Kina ishte një nga kërcënimet më të mëdha për Britaninë dhe aleatët e saj dhe se një “gjykim i gabuar” i Pekinit mund të çojë në luftë.
Ai tha se Kina, Rusia, Irani dhe terrorizmi ndërkombëtar përbëjnë “katërshen e madhe” të çështjeve të sigurisë me të cilat përballen spiunët britanikë në një botë të paqëndrueshme.
Në fjalimin e tij të parë publik që kur u bë kreu i MI6 në tetor 2020, Moore tha se Kina ishte “prioriteti kryesor i vetëm” i agjencisë së inteligjencës pasi udhëheqja e saj mbështet gjithnjë e më shumë “veprim të guximshëm dhe vendimtar” për të ndjekur interesat e veta.
Moore e quajti Kinën një “shtet autoritar, me vlera të ndryshme” se ai i Britanisë, duke thënë se Pekini po kryente “operacione spiunazhi në shkallë të gjerë” kundër Britanisë dhe aleatëve të saj, duke u përpjekur të “shtrembërojë diskursin publik dhe vendimmarrjen politike” dhe duke eksportuar teknologji që mundëson rrjetin të kontrollit autoritar” në mbarë botën.
Ai tha se Britania ishte ende “përballë një kërcënimi akut nga Rusia”, se Moska kishte financuar tentativa për vrasje, si helmimi i ish-spiunit Sergei Skripal në Angli në vitin 2018, se qëndronte pas numrit në rritje të sulmeve të hakerëve dhe po përpiqej të ndërhynte në proceset demokratike të vendeve të tjera.
“Ne dhe aleatët dhe partnerët tanë duhet të kundërshtojmë aktivitetet ruse që janë në kundërshtim me sistemin e bazuar në rregulla ndërkombëtare”, tha shefi i MI6.
Moore tha se Irani gjithashtu përbën një kërcënim të madh dhe po përdor grupin e Hezbollahut për të nxitur trazira politike në vendet fqinje. /tesheshi.com/
