Kandidatja e Lëvizjes Pesë Yjet do të bëhet kryebashkiakja e parë e Romës, pasi rezultatet tregojnë se ajo ka fituar në raundin e dytë të zgjedhjeve vendore.
Një 37-vjeçare juriste deri pak muaj përpara gati e panjohur, ajo duket t’ia ketë dalë të fitojë ndaj Roberto Giachetti-t të Partisë Demokratike.
“Do të jem një kryetare bashkie për të gjithë romanët. Do të kthej ligjshmërinë dhe transparencën në institucionet e qytetit pas 20 vitesh qeverisje të dobët. Me ne po hapet një erë e re,” do të deklaronte Virginia Raggi.
Në Torino, gjithashtu, duket të ketë fituar një tjetër kandidate e Lëvizjes Pesë Yjet. Chiara Appendino do të jetë kryetarja e re e bashkisë së këtij qyteti.
Fitoret e kandidatëve të Lëvizjes Pesë Yjet shihen si një goditje për kryeministrin Matteo Renzi dhe për Partinë Demokratike. /tesheshi.com/
